“Birbaşa Bakı”nın baş məşqçisi: “Çempionlar Liqasını qazanmaq haqqımız idi”

“Ən çətin qrupa düşmüşdük. Buna baxmayaraq, qrupu birinci yerdə tamamladıq. Güclü rəqiblərlə qarşılaşdıq. Bir qədər də bəxtimiz gətirdi”.

Futbolxeber.az saytına açıqlamasında bu sözləri minifutbol üzrə Çempionlar Liqasının qalibi olan “Birbaşa Bakı” klubunun baş məşqçisi Dan Marius Mitu deyib.

O, paytaxt təmsilçisinin çempionluğa layiq olduğunu bildirib: “Ümumilikdə komandamız çox yaxşı oyun göstərdi. Turniri qazanmaq haqqımız idi. Çünki biz yarışın ən güclü komandası idik”.

Növbəti planları barədə mütəxəssis bunları söyləyib: “Komandaya iki günlük istirahət verilib. Bundan sonra məşqlərə başlayacağıq. Ölkə çempionatında yeni mövsümün startına bir aydan da az qalıb”.

D.Marius artıq Azərbaycan klublarının Avropada adından söz etdirdiyini vurğulayıb: “Keçən ildən Avropada gücümüzü göstərməyə başlamışıq. Ötən il “Zirə” Çempionlar Liqasında üçüncü yeri tutmuşdu. Bu dəfə isə biz qalib olduq. Avropanın digər klubları bizdən qorxmağa başlamalıdırlar. Məqsədimiz budur. Əlimizdən gələni edəcəyik ki, “Birbaşa Bakı” Avropa minifutbol xəritəsində öz layiqli yerini tutsun. Gələn mövsüm də titulumuzu qorumağa çalışacağıq”.

“Çıxışınızın əvvəlində “Bir qədər bəxtimiz gətirdi” dediniz. Bu zaman nəyi nəzərdə tuturdunuz?” sualını rumın məşqçi belə cavablandırıb: “İdmanda bəxt önəmli amildir. Bir matçda penaltilərdə qalib gəldik. Bəxtimiz gətirdi deyəndə bunu nəzərdə tutmuşdum. Düzdür, penaltilər seriyasına öncədən hazırlaşmışdıq. Qapıda dəyişiklik etdik, Elmar Qasımova şans verdik. O da etimadı doğrultdu. Ümumiyyətlə, turnir boyu digər komandalardan daha yaxşı idik. Layiq olduğumuz çempionluğu qazandıq”.

İbrahim Cəfərov