“Neftçi” və “Karvan”da mənə yaşatdıqları həyatı futbolçularıma yaşatmayacağam”

“Hazırda AZAL-da 5 futbolçu icarə əsasında çıxış edir. Onların komandada qalıb-qalamayacaqları hələ məlum deyil. Mövsüm başa çatdıqdan sonra heyətimizdə saxlamaq istədiyimiz futbolçuların klubları ilə danışıqlara başlayacağıq”. Futbolxeber.az-ın məlumatına görə, bu sözləri AZAL-ın baş məşqçisi Tərlan Əhmədov deyib.

Əhmədov zədəli olan futbolçuları komandadan göndərməyəcəyini bildirib: “Komandada uzunmüddətdir zədədən əziyyət çəkən futbolçular var. Lakin mən onları heyətdən uzaqlaşdırmayacağam. Çünki özüm də futbolçu olmuşam və bu hissin nə demək olduğunu çox gözəl bilirəm. “Neftçi” və “Karvan”dan məni zədəli olduğum üçün uzaqlaşdırdılar. Amma mən o həyatı futbolçularıma yaşatmayacağam. Oynamasalar belə, komandada qalacaqlar”.