Elvin Məmmədov: “Bu dəqiqə o riski edə bilmərik”

“Səbail”in baş məşqçisi Elvin Məmmədovun Futbolxeber.az saytına müsahibəsi

- I Liqanın üçüncü turunda “Şahdağ Qusar”ı 2:0 hesabı ilə məğlub etdiniz. Görüşlə bağlı nə deyə bilərsiniz?

- Oyun çox yaxşı keçdi. I Liqa üçün çox gözəl qarşılaşma oldu. Təki, bütün matçlar belə olsun. I Liqada komandaların hamısı inkişaf edir. Meydanda çox yaxşı temp var idi. Sərgilənən oyuna görə hər iki komandanı təbrik edirəm. Çempionata yaxşı start vermişik. “Şahdağ Qusar”la matçda da qələbəmizi qazandıq. Uşaqlar çox əziyyət çəkdilər. Yolumuza davam edirik.

- “Səbail” birinci hissədə çox parlaq oyun nümayiş etdirsə də, fasilədən sonra daha ehtiyatlı oynadı. Bu, nədən irəli gəlirdi?

- Çatışmayan cəhətlərimiz var. Hər oyunu analiz edib, daha yaxşı hazırlaşmağa çalışırıq. Düzdür, deyilən şeylər var idi. Səhvlərimiz üzərində işləyir və onları aradan qaldırmağa çalışırıq.

- Yəqin ki, qol epizodlarının sağa-sola xərclənməsindən narazısınız...

- Əlbəttə, futbolda belə hallar olur. Amma dediyim kimi, temp əla idi. Açılmalar, ötürmələr... səhvlərimiz də var. Üzərində işləyirik.

- Komandaya böyük ümidlərlə transfer olunan iranlı hücumçu Ali Babaeini bu matçda da iş başında görmədik. Oyunun sonlarında ona şans vermək olmazdı?

- O, hələ tam hazır deyil. Bu dəqiqə o riski edə bilmərik. Bizim üçün lazımlı futbolçudur, lakin tam hazır deyil, bu səbəbdən də gözləyirik. Onu itirmək istəmərik. Çünki mövsüm öncəsi komanda ilə birgə hazırlıq keçməyib. Növbəti turlarda Ali Babaei də şans qazanacaq.

- Çempionluq yolunda əsas rəqibiniz olan “Şəfa”dan hələlik xal hesabında olmasa da, top fərqində geri qalırsınız. Bu məqam sizi narahat etmir?

- Keçən dəfə də dedim, bizim üçün hər rəqib çətindir. Hər rəqibə qarşı 100 faizli hazırlaşırıq. “Şəfa” formadadır, yaxşı komandadır, güclü kollektivdir. Lakin bizim rəqibimiz tək onlar yox, bütün komandalardır. Liqadakı kollektivlərin hamısı bizim rəqibimizdir.

İBRAHİM