Musa Qurbanlı: “Hər zaman milliyə kömək etməyə hazıram”

“Əzmkar mübarizə aparacağıq ki, qələbə qazanaq. Bunun fərqindəyik. Özümə gəldikdə mövsümün əvvəlində zədələndim, əməliyyat olundum. Təzə-təzə başlamışam oynamağa. Çalışıram ki, optimal formamı bərpa edim. Ondan sonra hər şey özü yerini tutacaq”.

Futbolxeber.az saytının məlumatına görə, bu sözləri milli komandamızın hücumçusu Musa Qurbanlı sabah UEFA Millətlər Liqasının qrup mərhələsi çərçivəsində Estoniyaya qarşı keçiriləcək oyundan əvvəl təşkil olunan mətbuat konfransında deyib.

O, millimizin çalışdırıcısı Fernandu Santuşu böyük məşqçi adlandırıb: “Hər məşqçinin öz baxışı var. Fernandu Santuş böyük məşqçidir, nailiyyətləri göz qabağındadır. Onunla ilk təlim-məşq toplanışımdır. Öz fəlsəfəsi, düeşüncələri var. İlk növbədə buna öyrəşməli, alışmalıyıq. Məşqçinin fəlsəfəsini meydanda 100 faiz həyata keçirməliyik. Bunu edəndən sonra nəticələr daha da yaxşılaşacaq”.

Qurbanlı İsveçdə karyerasını uğurlu alınmamasını çətinliklə əlaqələndirib: “Bunu normal qarşılayıram. Çətin oldu. Mental olaraq asan deyildi. Fərqindəydim ki, məndən gözləntilər böyükdür. Gənc azərbaycanlı futbolu kimi Avropaya yollanmışdım. Özümün özümdən də gözləntilərim yüksək idi. Bir az çətinliklər oldu. Çalışıram ki, bunu müsbət tərəfə aparım. Hər futbolçunun karyerasında çətinliklər olur. Çətinliklər olmasa, nailiyyətlər də əldə edilməz Bundan nəticə, yaxşı mənada dərs çıxarmalıyam. Hər nə qədər çətin olsa da, bu, məni həvəsdən salmamalıdır. Gəncəm, karyeramın əvvəlidir, 22 yaşım var. Yaxşı təcrübə idi. 1 il Avropada, ölkə xaricində futbol oynadım. Çalışacağam ki, gələcəkdə hər şey daha yaxşı olsun”.

Estoniya millisinin futbolçularının səviyyəsi barədə sualı 22 yaşlı hücumçu belə cavablandırıb: “Açığı, Estoniyanın futbolçularını, bir-bir tanımıram, hansı klublarda oynamaları barədə məlumatsızam. Bu, mənim üçün çox da maraqlı deyil. Bəzən çox güclü komanda belə zəifə uduzur. Futbolda hər şey mümkündür. Öz oyunumuza köklənsək, öz oyunumuzu yaxşılaşdırsaq, rəqibi taktiki cəhətdən analiz edərək qələbə qazana bilərik. Detallara çox fikir vermirəm. Çalışıram ki, meydana çıxıb öz işimi görüm”.

O, milliyə sonradan dəvət almasına da münasibət bildirib: “Hər futbolçu millidə oynamaq üçün can atır. Başa düşürəm ki, zədədən təzə qayıtmışam. Amma hər zaman millidə oynamağa hazıram. Baş məşqçi dəvət etdi, mən də əlimdən gələni edəcəm ki, ümidləri doğruldum”.