Şahruddin Naninin "Aktobe"yə mümkün keçidindən danışdı

“Qarabağ”ın və Azərbaycan millisinin qapıçısı Şahruddin Məhəmmədəliyev keçmiş komanda yoldaşı, portuqaliyalı ulduz futbolçu Naninin "Aktobe"yə keçidi ilə bağlı yayılan xəbərlərə münasibət bildirib.

Futbolxeber.az saytının məlumatına görə, o, Qazaxıstanın asnews.kz portalına müsahibəsində Naninin böyük şəxsiyyət olduğunu vurğulayıb:

"Komandanı hətta meydana çıxmadan da gücləndirə bilər. Nani heç bir şübhə olmadan futbol əfsanəsidir. Belə futbolçular soyunub-geyinmə otağında və məşqlərdə çox vacib rol oynayır, xüsusilə gənclərə daim motivasiya verir və yol göstərir. Hətta ideal formada olmasa belə, Nani komandasına fayda verəcək. O, böyük peşəkardır və özünə yaxşı baxır. Əgər “Aktobe”yə keçməyə qərar veribsə, meydanda sadəcə formal oynamayacaq”.

Qeyd edək ki, Şahruddin və Nani 2023/24 mövsümündə Türkiyənin “Adana Demirspor” klubunda birlikdə çıxış ediblər. Həmin mövsümdə futbolçular 16 oyunda birlikdə meydanda olublar. Eyni zamanda Nani “Aktobe”nin yetirməsi, Qazaxıstan millisinin hücumçusu Abat Aymbetovla da 3 matçda birgə oynayıb.

Yayılan xəbərlərə görə,  “Aktobe” Nani ilə 1 illik müqavilə üçün razılıq əldə edib. Portuqaliyalı futbolçunun maaşının Qazaxıstan Premyer Liqası tarixində rekord olacağı gözlənilir.

Bildirilir ki, 39 yaşlı Nani yanvarın 22-də Almatıya uçacaq, daha sonra Aktobeyə yollanaraq rəsmi təqdimatda iştirak edəcək.

Xatırladaq ki, Nani karyerası ərzində “Mançester Yunayted”, “Sportinq”, “Fənərbaxça”, “Valensiya”, “Latsio” kimi klublarda çıxış edib. O, “Mançester Yunayted”lə Çempionlar Liqasının qalibi olub, 4 dəfə İngiltərə çempionluğunu qazanıb. Portuqaliya millisinin heyətində isə 2016-cı ildə Avropa çempionu adını qazanı (qol.az).