Foqts: "Heç-heçəyə sevinməməliyik"

Sabah DÇ-2014-ün seçmə mərhələsində Şimali İrlandiya ilə qarşılaşacaq milli komandamızın baş məşqçisi Berti Foqts bu gün mətbuat konfransı keçirib. Futbolxeber.az-ın məlumatına görə, alman çalışdırıcı ilk növbədə problemlərdən gileylənib: "Hazırlığın gedişindən razıyam. Bəzi insanlar tez hazırlığa başlamağımızdan narazı idi. Vaqif Cavadovun çiynində zədə var, Ruslan Abışov isə oyunu buraxacaq. İsraillə oyunda qələbə qazanmalı idik. Mahir Şükürov orda səhvə yol vermişdi. Şimali İrlandiya ilə görüşdə hakimin çox vaxt əlavə etməsi sayəsində xal itirdik. Komandada təzyiq var. Ümid edirəm ki, peşəkar futbolçularımız buna dözəcək".

Foqts rəqibin kobud oynadığını qeyd edib: "Şimali İrlandiyanı yaxşı tanıyırıq. Azərbaycanlı futbolçular fərqlidirlər. Bizimkilər gözəl, ötürməli oyunu sevirlər. Fikirləşirəm ki, hakim gözəl futbolumuza ləkə gətirməyəcək. Britaniyalılardan fərqli, biz kobud oynamırıq. Futbolda hər şey ola bilər. Biz İsraillə heç-heçə etdik. Bəziləri buna sevindi. Ancaq heç-heçəyə sevinməməliyik".