Ruslan Abışov: “Dildə “üçüncü yeri tutmaq istəyirik” demək asandı”

“Təəssüflənirəm ki, Rusiyada Azərbaycan futbolunun imicinə zərbə vurduq. Əvvəlki oyunlarda ruslara qarşı yaxşı çıxış etmişdik”. Futbolxeber.az-ın məlumatına görə, bu sözləri milli komandamızın üzvü Ruslan Abışov deyib.

Abışov milliyə legionerlərin cəlb olunması barədə sualı belə cavablandırıb: “ Bu haqda fikir bildirməyəcəm. Elin gözü tərəzidi. Bununla bağlı baş məşqçi və assosiasiya rəhbərliyi qərar verir. Futbolçu kimi komanda yoldaşlarıma hörmət edirəm”.

 Çoxları kimi Ruslab Abışov da “Qarabağ”ın üzvü Reynaldonun milliləşdirilməsinin tərəfdarıdır: “ Reynaldo, Riçard Almeyda kimi futbolçular milliyə faydalı ola bilər. Hər ikisinin səviyyəsi göz önündədir. İlk növbədə yerli futbolçuların oynamasının tərəfdarıyam. Legionerlərə ehtiyac var, bu cür futbolçuların milliləşdirilməsi daha faydalı olar”.

“Millinin qarşısına qrup mərhələsini üçüncü pillədə başa vurmaq tapşırığı qoyulub. Komanda üzvləri arasında buna inam varmı” sualını Abışov belə cavablandırıb: “Yığmada yaxşı futbolçular cəmləşib. Düzdür, dildə “üçüncü yeri tutmaq istəyirik” demək asandır. Gərək meydanda əziyyət çəkəsən. Hər şey özümüzdən asılı olacaq. Ev oyunlarında maksimum xal toplamalıyıq”.