Vitali Borisov: "Qələbə qazanmaq üçün əlimizdən gələni edəcəyik"

“Bu gün (dünən) günortaya yaxın Niderlanda gəlmişik. Uşaqlar uzun yol qət etdilər. Buna baxmayaraq, yorğunluq fonunda ilk məşqimizi reallaşdırdıq".

Futbolxeber.az-ın məlumatına görə, bu sözləri Azərbaycanın futzal millisinin baş məşqisi Vitali Borisov federasiyanın rəsmi saytına açıqlamasında deyib.

O, DÇ-2024-ün elit-raund mərhələsi çərçivəsində Niderland yığmasına qarşı keçirəcəkləri matç haqda danışarkən heyətin hazırkı durumuna toxunub: "Futzalçılar çalışdılar ki, onlara verilən tapşırıqları yerinə yetirsinlər. Rumıniya ilə matçla müqayisədə heyətimizdə iki dəyişiklik var. Amadeu zədə səbəbindən bizə kömək edə bilməyəcək. Onu Eduardo Borges əvəzləyəcək. Edu 3 gün əvvəlki matçı cəzalı olduğuna görə buraxmaq məcburiyyətində qalmışdı".

Gənc mütəxəssis Niderlandla oyunda qələbə qazanmaq üçün əllərindən gələni edəcəklərini deyib: "Qələbə qazanmaq üçün əlimizdən gələni edəcəyik. Rəqibi təhlil etmişik. Futzalçılara da müəyyən tapşırıqlar veriləcək. Rəqibin standart vəziyyətlər zamanı, eləcə də “5-in” “4-ə” oyunayan zaman hansı üstünlüklərə malik olacaqlarını və bizim nələr etməli olduğumuzu deyəcəyəm. Şansımızın olub-olmamasından asılı olmayaraq, qələbə qazanmaq istəyirik”.

Qeyd edək ki, dekabrın 20-də keçiriləcək Niderland - Azərbaycan görüşü Bakı vaxtı ilə saat 21:30-da başlayacaq. Azərbaycan millisi qələbə qazansa da, növbəti mərhələyə yüksəlmək şansı olacaq. Bu, digər oyunlarda qeydə alınacaq nəticələrdən asılıdır.