“Partizan”ın qapıçısı: “Mərhələ adlayacağıq”

“Partizan”ın qapıçısı Aleksandr Yovanoviç Konfrans Liqasının 3-cü təsnifat mərhələsində Bakıda "Sabah"a uduzduqları oyun (0:2) haqda danışıb.

Futbolxeber.az saytının Serbiya mətbuatına istinadən verdiyi məkumata görə, o, məğlubiyyətə baxmayaraq, mərhələ adlayacaqlarına inandığını deyib:

“Əgər Belqraddakı cavab oyununun ilk 20 dəqiqəsində qol vursaq, yenidən mübarizəyə qayıdacağıq. Buraxdığımız ikinci qol üçün təəssüf hissi keçirirəm. Belə bir oyunda 1:0 və ya 2:0 uduzmaq eyni deyil... Mən ürəkdən inanıram ki, biz mərhələ adlayacağıq.

Bu gün (dünən - red.) bu temperaturda oynamaq asan deyildi. Bu, əslində bəhanə deyil. Amma insanlar belə hava şəraitində oynamağın necə çətin olduğunu bilmirlər. Əvvəllər belə havada Kiprdə oynamışam və bu mənim üçün çətin idi”.

31 yaşlı qapıçı 69-cu dəqiqədə Aleksey İsayevin penalti zərbəsini dəf edib. Yovanoviç bu haqda danışarkən bildirib: "Komandaya kömək etməyə çalışıram. İndi kifayət qədər təcrübəliyəm. Bəzi fərdi uğurlar məni qane etmir. Mən komanda uğurlarına üstünlük verirəm. Buna görə də "Paritzan"a gəldim".

Qeyd edək ki, avqustun 17-də Belqraddakı “Partizan” stadionunda keçiriləcək cavab oyunu Bakı vaxtı ilə saat 23:00-da başlayacaq.