İbrahimoviç: “Təkcə özümü düşünsəydim, indi adada siqar çəkirdim”

41 yaşlı Zlatan İbrahimoviç karyerasını davam etdirməsi barədə danışıb.

Futbolxeber.az saytının İtaliya mətbuatına istinadən verdiyi məlumata görə, “Milan”ın hücumçusu təcrübəsini gənclərlə bölüşmək istədiyini bildirib:

“Mən hər gün öz istedadımı nümayiş etdirməyi arzulayıram. Lakin bu, təkcə şəxsi məsələ deyil. Mən həm də təcrübəmi gənclərlə bölüşmək, onlara fayda vermək, inkişafları üçün əlimdən gələni etmək istəyirəm. Biz komanda olaraq qələbə qazanırıqsa, bunda mənim də rolum var. Fərqi yoxdur meydana çıxdım, ya yox. 41 yaşım var və “Milan”da forma geyirəm. Mən zirvədəyəm. İndi istəyirəm ki, digərləri də diqqət mərkəzində olsunlar. Mən yalnız özümü düşünsəydim, indi adada siqaret çəkirdim. Əgər lider və nümunə ola bilirəmsə, bunu edəcəm”.

Qeyd edək ki, ötən mövsüm İbrahimoviçin qayıdışından sonra “Milan” 9 illik fasilədən sonra İtaliya çempionu olub.