Ayxan Abbasov: "Pulumuz bitənə kimi transfer edəcəyik"

“Səfərdə “Sabah”la matçda bir xal qazanmaq da bizi sevindirdi. Çətin olacağını bilirdik. Çünki yeni komandayıq, yeni oyunçular var. Futbolçularım müdafiə planında ilk dəqiqələrdə səhvlərə yol verdi və qollar buraxdıq. Amma ruhdan düşmədik, iki qol vurduq. “Sabah”a iki qol vurmaq futbolçularıma inam verir. Hər xal bizim üçün vacib olacaq”.

Futbolxeber.az saytının məlumatına görə, bu sözləri “Şamaxı”nın baş məşqçisi Ayxan Abbasov Azərbaycan Premyer Liqanın ilk turunda “Sabah”a qarşı keçirilən oyundan (2:2) sonra deyib.

Həm oyundan, həm də nəticədən razı qaldığını bildirən mütəxəssis hədəflərindən də söz açıb: “Oyun baxımdan artırmalıyıq. Bu gün birinci oyuna görə razı qaldıq. Amma bizi qarşıda çətin matç gözləyir, bizim üçün asan olmayacaq. Gənc futbolçular üçün də böyük şansdır. Həmişə gileylənirik ki, gənc futbolçulara şans verilmir. Həqiqətən potensiallı futbolçularımız var. Komandama inanıram. Elə bura da, inanaraq gəlmişəm. Bir-iki futbolçunun da olmasını istəyərdik. Brahim Konate də zədəlidir. Bu mövsüm əsas məqsədimiz Premyer Liqada möhkəmlənməkdir. İstədiyim oyunu hələ ki, görmürəm. Bundan yaxşı olmağa çalışacağıq”.

“Transferlər yekunlaşıb?” sualını A.Abbasov belə cavablandırıb: “Pulumuz bitənə kimi transfer edəcəyik. Hələ ki, pulumuz qalıb”.