“Sabah” UEFA-ya müraciət etdi

"Sabah" Konfrans Liqasının 2-ci təsnifat mərhələsində Latviya RFŞ-i ilə səfər oyununun başqa ölkədə keçirilməsi üçün UEFA-ya müraciət edib.

Futbolxeber.az saytının sportacentrs.com-a istinadən verdiyi məlumata görə, bu barədə Latviya Futbol Federasiyasının prezidenti Vadim Laşenko bildirib. O, Azərbaycan təmsilçisinin baş məşqçisi və məşqçi heyətinin rusiyalı olması səbəbindən belə bir addım atıldığını qeyd edib: “Hazırda məsələyə UEFA-da baxılır. Biz çalışırıq ki, oyun Latviyada olsun. Amma UEFA fərqli qərar verə bilər. “Sabah”ın baş məşqçisi və məşqçi heyətinin şengen vizası olmadığı üçün Azərbaycan klubu çətinliyi nəzərə alaraq UEFA-ya müraciət edib”.

Qeyd edək ki, "Sabah" buna baxmayaraq, bu gün Latviyaya yollanıb. Lakin klubun baş məşqçisi Murad Musayevin və məşqçi heyətinin paytaxt Riqaya buraxılıb-buraxılmayacağı naməlumdur.

Xatırladaq ki, RFŞ - “Sabah” matçı sabah keçiriləcək.