Aftandil Hacıyevin bəhanəsi: “Hakim səhvlərinə görə mərhələ keçə bilmirik”

"Rəqibi mərhələni keçmək münasibəti ilə təbrik edirəm. Ancaq təbriklə kifayətlənmək niyyətində deyiləm. Bilmirəm, bu, adətdir, yoxsa nədir. Amma ardıcıl ikinci mövsümdür ki, hakim səhvlərinə görə 1/4 final mərhələsini adlaya bilmirik".

Futbolxeber.az saytının məlumatına görə, bu sözləri "Səbail"in baş məşqçisi Aftandil Hacıyev Azərbaycan Kubokunun 1/4 finalında evdə "Sumqayıt"a 1:2 hesabı ilə uduzduqları cavab oyunundan sonra mətbuat konfransında deyib.

Bununla belə, Hacıyev rəqibin qələbəsinə kölgə salmaq istəmədiyini vurğulayıb: "Fasilədən sonra biz hücumda daha aktiv idik. İlk oyunda da sayılmayan qolumuz oldu. Futbolçuların əsəbləri ilə bu qədər oynamaq olmaz. Bilmirəm, amma komandamızın oyunlarında hakim səhvləri çoxalır. İlk oyundakı qol da təmiz idi. İstəməzdim hakimlik üzərində bu qədər dayanım, amma məcburam. Yenə də deyirəm, "Sumqayıt"ın qələbəsinə kölgə salmıram. Bütün gücümüzü çempionata yönəldəcəyik”. (“Report”)