Şahin Diniyev: “Qurban Qurbanovun işi 4-5 oyundan sonra ortaya çıxacaq”

“Belarusla oyunu izlədim. Millinin çıxışı haqda indidən konkret bir fikir söyləmək çox çətindir. Çünki hələ başlanğıc mərhələsidir. Qarşıda uzun bir yol var”.

 

Futbolxeber.az-ın məlumatına görə, bu sözləri Qol.az-a açıqlamasında “Kəpəz”in sabiq baş məşqçisi Şahin Diniyev deyib. 

 

Millimizin Belarusla yoldaşlıq oyununu dəyərləndirən mütəxəssis komandamızın pis təsir bağışlamadığını bildirib: “Belarus Lixteynşteyn, Farer Adaları kimi sıradan komanda deyil. Millimiz belə bir yığmaya qarşı hücumda oynadı və pis təsir bağışlmadı. Topa nəzarət də futbolçularımızın əlində idi. Hiss olunur ki, Qurban Qurbanov beynində olan sistemi yeritməyə çalışır. Baş məşqçinin əl işi 4-5 oyundan sonra ortaya çıxacaq. Klublarında oynayan futbolçuları milliyə çağırıb. Məncə, normal yanaşmadır”.

 

Millimizin sabiq çalışdırıcısı Belarusa 0:1 hesablı məğlubiyyətdən sonra Qurbanovun tənqid olunmasına da münasibət bildirib: “Məşqçinin kimliyindən asılı olmayaraq, hazırda tənqid etməyə heç bir əsas yoxdur. Şəxsən mən normal milli komandada müsbət şeylər görürəm. Ən əsası, başlanğıc düzgündür”.

 

Təcrübəli mütəxəsis millimizin sabah Makedoniya ilə keçirəcəyi yoldaşlıq oyununa da toxunub: “Düşünürəm ki, təxminən Belarusa qarşı sərgilənən oyunu görəcəyik. Milliyə 25-26 futbolçu dəvət olunub. Məncə, baş məşqçi 2 oyundan sonra heyəti formalaşadırmağa başlayacaq. Komanda 50-60 faiz hazır olcaq. Ondan sonra isə öz sistemini yeridəcək. Qurban Qurbanov hazırda nəticədən çox komandanı formalaşdırmağa çalışır. Bünövrəsi möhkəm olan milli hazırlayır”.