Samir Abbasov: “Öz adımdan azarkeşlərdən üzr istəyirəm”

“Əvvəlcə xalqımıza başsağlığı verirəm. Son günlər cəbhədə dünyasını dəyişən şəhidlərə Allahdan rəhmət diləyirəm. O ki qaldı görüşə, bu oyunun ədalətli nəticəsi elə heç-heçə idi”. Futbolxeber.az saytının məlumatına görə, bu sözləri “Qəbələ” ilə oyundan sonra “Sumqayıt”ın baş məşqçisi Samir Abbasov deyib.

Gənc məşqçi bildirib ki, komandasında “təmizləmə əməliyyatı”nı davam etdirəcək: “Ötən həftə 3 oyunçunu komandadan uzaqlaşdırdıq. Onların gedişindən sonra futbolçular məşqlərdə tam gücləri ilə çalışdılar. Yanvardan sonra komandamın belə məşq etdiyini görməmişdim. Mövsümün sonunda, ya da elə mövsüm gedə-gedə narazı qaldığımız futbolçuları yenə də komandadan uzaqlaşdıracağıq”.

“Sumqayıt”ın çalışdırıcısı oyunun gedişində yaşlı azarkeşi söyən Ağabala Ramazanovla bağlı tədbir görəcəklərini bildirib: “Mən hadisəyə şahid olmamışam. Amma siz deyirsinizsə, inanıram və bu məsələni araşdıracağıq. Mən öz adımdan azarkeşlərdən üzr istəyirəm. Kiminsə başqasını söyməyə haqqı yox”.