"Emin Toşakdan çox şey öyrənməlidir"

"Con Benjamin Toşakın "Xəzər Lənkəran"dakı köməkçilərinin kimliyinə hələ ki, aydınlıq gəlməyib". Bu sözləri Futbolxeber.az saytına verdiyi açıqlamada "Xəzər Lənkəran"ın idman direktoru Babək Quliyev deyib.

B.Quliyevin sözlərinə görə, bu məsələ qarşıdakı günlərdə həllini tapacaq: "Bu gün əvəzedici heyətlə yoxlama oyunumuz var. Həmin matçdan sonra isə futbolçulara 3 günlük istirahət veriləcək. Böyük ehtimalla, komanda istirahətdən döndükdən sonra Toşakın köməkçilərinin məsələsinə də aydınlıq gələcək. Toşak hələ ki futbolçuları sınayır. Onların nəyə qadir olduqlarını daha yaxından bilmək istəyir".

Emin Quliyevin Toşakın məşqçilər korpusunda yer alacağı barədə yayılna xəbərlərə isə Babək Quliyev belə aydınlıq gətirdi: "Mən də ümid edirəm ki, Emin Quliyev Toşakın məşqçilər korpusunda yer alacaq. Birinci Emin gəncdi. İkincisi də uzun illər futbolçu kimi də "Xəzər Lənkəran"da çıxış edib. İndi də məşqçilər korpusunda yer alır. Yəni, komandaya yaxından bələddir. Həm də Toşak dünya səviyyəli mütəxəssisdi. Onunla birgə çalışmaq Emin Quliyevə çox faydalı olar. Emin Toşakdan çox şey öyrənməlidir".