Pula görə “Real”la Asensio arasında fikir ayrılığı

“Real” rəhbərliyi ilə komandanın üzvü Marko Asensio arasında yeni müqavilə ilə bağlı aparılan danışıqlar yarımçıq qalıb.

Futbolxeber.az saytının xarici KİV-ə istinadən verdiyi məlumata görə, maliyyə məsələsində tərəflər arasında fikir ayrılığı yaranıb.

Asensionun madridlilərlə hazırkı müqaviləsi bu ilin iyununda başa çatır. Ötən ilin dekabrında “Real” sözləşmənin yenilənməsi üçün futbolçuya ilk təklifini irəli sürüb. Həmin vaxt müqavilənin 4 illiyinə uzadılması barədə razılıq əldə olunub. Lakin maddi məsələdə ortaq məxrəcə gəlmək mümkün olmayıb.

Asensionun hazırkı illik məvacibi 4,5 illik milyon avro təşkil edir. Klub yeni müqavilədə illik məvacibi 4,8 milyon avroya yüksəltsə də, futbolçunun meneceri illik 6 milyon avro tələb edib. Asensio isə bildirib ki, illik 5,5 milyon avrodan aşağı məvacibə razılaşmayacaq. “Real” isə futbolçuya maksimum ildə 5 milyon avro ödəməyə hazırdı. Çünki Asensio son zamanlar əsas heyətdə çox az meydana çıxır. Cari mövsüm bütün turnirlər nəzərə alınmaqla, Asensio 26 görüşdə forma geyib, 5 qol vurub, 4 məhsuldar ötürmə verib.