“Səbail”in kapitanı: “Meydanın durumu futbol oynamağımıza imkan vermədi”

“Məncə, ədalətli nəticə oldu. Bir xal qazandıq. Hava şəraiti futbol üçün uyğun deyildi. Sözün açığı, meydanda futbol adına heç nə yox idi”.

Futbolxeber.az saytına müsahibəsində bu sözləri “Səbail”in kapitanı Yusif Nəbiyev Azərbaycan Premyer Liqasının XVII turunda “Şamaxı”ya qarşı keçirdikləri oyun (0:0) barədə danışarkən deyib.

O bildirib ki, buzlu meydançada texnikalı futbol nümayiş etdirmək qeyri-mümkündür: “Əlbəttə, qələbə qazanmaq istəyirdik. Şamaxıya 3 xal üçün gəlmişdik. Təəssüf ki, meydanın durumu futbol oynamağımıza imkan vermədi. Belə hava şəraitində bundan artıq nəsə etmək qeyri-mümkündür”.

27 yaşlı müdafiəçi növbəti turda “Zirə”yə qarşı keçirəcəkləri oyundan da söz açıb: “Əlimizdən gələnin ən yaxşısını edəcəyik. Çalışacağıq ki, “Zirə”ə ilə görüşdə xal və ya xallar qazanaq. Bu gün elə vəziyyətdəyik ki, 1 xal da bizim üçün qızıla bərabərdir”.

Y.Nəbiyev yeni baş məşqçi Cavid Hüseynovun zamana ehtiyacı olduğunu düşünür: “Baş məşqçimiz yenidir. Getdikcə Cavid Hüseynovun istədiklərini meydanda daha yaxşı yerinə yetirəcəyik. Birdən birə heç nə olmur. Zaman lazımdır. Məncə, qış fasiləsindən sonra daha yaxşı edəcəyik”.

“Səbail”in kapitanı vurğulayıb ki, indiki məqamda komandasının məqsədi Premyer Liqada yerini qorumaqdır: “Hazırkı durumda ən yaxşı hal təhlükəli zonadan çıxmaqdır. Çünki sonuncu yerdəyik. Bu halda hansısa hədəfdən danışmaq olmaz. Məqsəd Premyer Liqada qalmaqdır. İnanıram ki, bunu bacaracağıq. Qışda heyətimiz güclənsə, bu vəziyyətdən daha tez çıxacağıq”.

Fərəc Aslanov