Erik Sorqa: “Qarabağ”a qarşı oynamaq çox çətindir”

“Qarabağ”a qarşı oynamaq çox çətindir. Onlar hazırda yaxşı formadadırlar. Azərbaycan çempionatında bəlkə də ən yaxşı mövsümlərini keçirirlər”.

Futbolxeber.az saytına müsahibəsində bu sözləri “Sumqayıt”ın hücumçusu Erik Sorqa Azərbaycan Premyer Liqasının 24-cü turunda “Qarabağ”a qarşı keçirdikləri oyun barədə danışarkən deyib.

Estoniyalı hücumçu 0:2 hesablı yenilgini belə şərh edib: “İlk hissədə yaxşı oyun nümayiş etdirdik, amma fasilədən sonra rəqib topa sahib olmaq baxımından üstün oldu. "Qarabağ" hazırda üst səviyyədə olan Avropa klubları ilə başa baş oynamağı bacarır. Düşünürəm ki, əlimizə düşən fürsətlərdən dəqiqliklə istifadə edə bilmədik. Əslində bu epizodlar üzərində çox işləməliyik”.

25 yaşlı forvard məğlubiyyətə baxmayaraq, turnir cədvəlində mövqelərini qorumalarına belə münasibət bildirib: “İkinci pillədə qalmaq üçün bacardığımızı edəcəyik. Hazırda Azərbaycan çempionatında ilk üçlükdəyik. Və bu pillə bizə gələn mövsüm avrokuboklarda oynamaq imkanı verir. Hazırda bu məqsəd uğrunda köklənməliyik”.

Sorqa növbəti turda "Kəpəz"lə matçda məqsədlərinin yalnız qələbə olduğunu söyləyib: “Son 3 oyunda qalib gəlməmişik. Bu vəziyyəti dəyişməli, qələbə qazanmağa köklənməliyik. Xallar qazanaraq yolumuza davam etməliyik”.

Sonda o, öz çıxışına da qiymət verib: “Belə hava şəraitində meydana çıxmaq biraz çətindir. Amma əlimdən gələni edirəm ki, azarkeşlər oyunumdan zövq alsınlar. Öz üzərimizdə məşq zamanı çox çalışıram”.

Azad NURİYEV