“Qəbələ” Avropa Liqasında

“Qəbələ” 2015/16 mövsümündə Avropa Liqasında çıxış edəcək. Futbolxeber.az-ın məlumatına görə, “Qırmızı-qaralar” ardıcıl olmaqla, tarixində 2-ci dəfə qitə miqyaslı turnirdə Azərbaycanı təmsil etməyə vəsiqə qazanıb. Roman Qriqorçukun yetirmələri avrokubok iştirakçıları arasında yerini Azərbaycan Premyer Liqasının XXXII turunun ilk oyun günündə təmin edib. Buna Zaqatala “Simurq”unun öz meydanında “İnter”ə 2:3 hesabı ilə uduzması səbəb olub. Xal itkisi meydan sahiblərinin ilk “dördlük”də yer alan klublara çatmayacağını rəsmiləşdirib. Beləliklə, son 8 çempionat oyununda 8 qələbə qazanıb, xal hesabını 46-ya çatdıran “Qəbələ” ötən il olduğu kimi yenə mövsüm basa çatmamış Avropa Liqasına vəsiqəni təmin edib. Həmin vaxt qitə miqyaslı turnirin I təsnifat mərhələsində oynamaq hüququ qazanan “qırmızı-qaralar” Bosniya və Herseqovinanın “Şiroki Briyeq” klubu ilə qarşılaşmada debüt etmişdi. İyulun 3-də Qəbələdə 0:2, 1 həftə sonra səfərdə 0:3 hesabı ilə məğlub olan komanda mərhələ adlaya bilməmişdi.