Elxan Məmmədov: “Sıxıntıya görə səmimi şəkildə təəssüflənirik”

DÇ-2026-nın püşkatma mərasiminin yayımı zamanı Krımın Ukraynaya daxil olmadığı xəritə göstərilib.

Futbolxeber.az saytının məlumatına görə, Ukrayna Xarici İşlər Nazirliyinin nümayəndəsi Georgi Tixi sosial şəbəkələrində xəritədə düzəldilmiş videodan kadr yayımlayıb və bildirib ki, Ukrayna tərəfi bu səhvə görə FİFA-nın ictimaiyyət qarşısında üzr istəməsini gözləyir.

Qeyd olunur ki, Ukrayna Futbol Assosiasiyası (UAF) artıq Ukraynanın xəritəsində Krımın olmaması ilə bağlı FİFA-nın baş katibi Matias Qraffström və UEFA-nın baş katibi Teodor Teodoridisə məktub göndərib.

Bundan sonra FİFA Ukrayna Futbol Federasiyasına cavab göndərib. Cavab məktubu federasiyaya FİFA-nın üzvü olan assosiasiyalarla qarşılıqlı əlaqə şöbəsinin müdiri Elxan Məmmədovun adından ünvanlanıb.

Məktubda bildirilib: "Biz bu məsələnin həssaslığını tam dərk edirik. Hadisə qəsdən törədilməsə də, buna səbəb ola biləcək hər hansı bir sıxıntıya görə səmimi şəkildə təəssüflənirik. Biz sizin bu vəziyyəti həll etmək üçün məsuliyyətlə çalışdığımız üçün göstərdiyiniz anlayışınızı qiymətləndiririk".

Eyni zamanda, məktubda vurğulanıb ki, püşkatma mərasimi üçün xəritə ilə infoqrafika “üçüncü tərəf” - kənar dizayn xidmətləri göstərən xarici podratçı tərəfindən hazırlanıb.

Cavab məktubunda bildirilib ki, FİFA Ukrayna tərəfinin şikayətindən sonra gələcəkdə oxşar səhvlərin qarşısını almaq üçün daxili araşdırmaya başlayıb.