"Mançini təklifi qəbul etməsəydi, "Qalatasaray"ın baş məşqçisi mən olacaqdım"

İtaliyalı məşqçi Edoardo Reja maraqlı açıqlama verib. Futbolxeber.az-ın məlumatına görə, Reja bir müddət əvvəl "Qalatasaray"ın maraq dairəsində olduğunu qeyd edib: "Qalatasaray" rəsmiləri mənimlə maraqlanırdı. İlkin danışığımız da olmuşdu. Lakin sonradan Mançini İstanbula yollandı. Əminliklə söyləyirəm ki, əgər, Mançini təklifi qəbul etməsəydi, "Qalatasaray"ın baş məşqçisi mən olacaqdım. İndi mətbuatda adım "Balonya" ilə yanaşı hallanır. Lakin bu haqda dəqiq bir söz deyə bilmərəm. Çünki klubun nümayəndələrindən heç kim mənimlə əlaqə qurmayıb".

Reja məşqçiliyə 1979-cu ildə başlayıb. 68 yaşlı mütəxəssis karyerası ərzində 21 klub çalışdırıb. Onlardan 20-si İtaliya təmsilçisidir. O, yalnız bir dəfə - 2009-2010-cu illərdə ölkəsindən kənarda işləyib. Həmin vaxt təcrübəli mütəxəssis Xorvatiyanın "Hayduk" klubunu çalışdırıb. Onun son iş yeri isə "Latsio" olub. 2010-cu ildən Roma klubunu çalışdıran Reja ötən il postundan ayrılıb. Rejanın karyerasındakı diqqətçəkən məqamlardan biri də onun eyni yerdə uzun müddət işləməməsidir. O, yalnız "Viçentsa" və "Napoli"də 2 ildən çox duruş gətirib.