Ayxan Quseynov: “3:0-dan sonra komanda dayandı”

“Düzdür, qalib gəldik, lakin bir qədər qarışıq oyun alındı”.

Futbolxeber.az saytına müsahibəsində bu sözləri “Turan Tovuz”un yarımmüdafiəçisi Ayxan Quseynov deyib.

Azərbaycan Premyer Liqasının X turunda “Sumqayıt” üzərində qazandıqları 4:2 hesablı qələbəni şərh edən 25 yaşlı futbolçu matç ərzində komandasının həm müsbət, həm də mənfi cəhətləri olduğunu bildirib: “Yaxşı cəhətlərdən biri o idi ki, ardıcıl qollar vurduq. Məhsuldarlığımız yüksək oldu. Buna qədər səfərdə 4 dəfə fərqlənməmişdik. Mənfi cəhət isə odur ki, 3:0-dan sonra komanda dayandı. Bilmirəm, bu, arxayınçılıqdan oldu, ya nədən, amma “Sumqayıt” üstünlüyü ələ aldı, fərqi də azaltdılar. Yaxşı ki, ikinci hissənin əvvəlində yenidən rəqib qapısına yol tapdıq. Əks halda işimiz daha çətin ola bilərdi. Gərgin matç alınsa da, əsas odur ki, qalib gəldik”.

O, komandasının ilk 10 turdakı çıxışını belə dəyərləndirib: “Dövrəni ikinci yerdə bitirdik. İndi də “Sumqayıt”ı məğlub etdik. İkinci yerdə olmağımız yaxşı nəticədir. Düzdür, ilk dövrəni məğlubiyyətsiz başa vurmaq istəyirdik. Təəssüf ki, alınmadı”.

A.Quseynov çempionatda rəqabətin artdığını bildirib: “Dediyim kimi, hazırda ikinci yerdəyik və bu, pis deyil. İndi bunun ardını gətirməliyik. Çalışmalıyıq ki, daha da irəli gedək. Düzdür, işimiz asan deyil. Çünki komandalar güclənib, rəqabət daha da artıb. Hər matç digərindən çətin keçir”.

“Turan Tovuz”un yarımmüdafiəçisi növbəti turda qarşılaşacaqları “Kəpəz”lə matçdan da söz açıb: “Kəpəz” autsayder olsa da, bizi heç də asan oyun gözləmir. Hazırkı vəziyyətdə hər matç bizim üçün vacibdir. Doğma azarkeşlərimiz önündə oynayacağıq. Ona görə də əlimizdən gələni etməliyik. İnanıram ki, Qərb derbisində sevinən tərəf biz olacağıq. Bu 3 xal bizim üçün çox vacibdir”.

Fərəc Aslanov