Kapello: “Azərbaycanla oyun asan keçməyəcək”

Rusiya millisinin baş məşqçisi Fabio Kapello sabah Azərbaycana qarşı keçiriləcək oyundan öncə mətbuat konfransı keçirib. Futbolxeber.az-ın “Sport-Ekspress”ə istinadən verdiyi məlumata görə, italyan mütəxəssis maaşının yubanmasını problem hesab etmir: “Məvacibimin gecikməsi məni narahat etmir. Bu haqda düşünmürəm. İlk növbədə məni Azərbaycan və Lixtenşteynə qarşı keçiriləcək oyunlar maraqlandırır”.

“Azərbaycanla oyunun sizin üçün əhəmiyyəti nə qədərdir” sualını Kapello belə cavablandırıb: “Asan oyun olmayacaq. Çünki Azərbaycan millisi son zamanlar xeyli “artırıb”. Sabahkı oyunda 6 əvəzetmə imkanımız olacaq. Mən də onların hamısından yararlanmaq istəyirəm. Əsasən az oynayan və ya ümumiyyətlə meydana çıxmayanlara şans vermək istəyirəm”.  

İtaliyalı mütəxəssis millimizə qarşı 4 müdafiəçi ilə oynayacaqlarını bildirib: “Oyun tərzini dəyişmək üçün əlinin altında lazımı oyunçular olmalıdır. Rusiya klublarınımn çoxu 4-3-2-1 taktiki sxemi ilə mübarizə aparırlar. Məşqçinin əsas vəzifəsi əlinin altındakı futbolçuların potensialını tam ortaya qoymaqdır. Amma onu deyə bilərəm ki, Azərbaycana qarşı 4 müdafiəçi ilə oynayacağıq. Qapıda da Akinfeyev dayanacaq”.