Vanoli: “Neftçi”nin oyun sistemi bu dəfə fərqli idi”

"Futbolçularıma təşəkkür edirəm. Hiss olundu ki, hazırkı heyətimizin Avroliqa təcrübəsi yoxdur. Buna görə də qapımızın toxunulmazlığını sona qədər təmin edə bilmədik”. Futbolxeber.az-ın məlumatına görə, bu sözləri “Neftçi” ilə oyundan sonra “Koper”in baş məşqçisi Rodolfo Vanoli deyib.

İtaliyalı mütəxəssis rəqibin bu dəfə fərqli sistemlə mübarizə apardığını qeyd edib: “Neftçi”nin oyun sistemi ilk görüşdə olduğundan fərqli idi. Ona görə də bizə bir qədər çətin oldu. Ümumiyyətlə, rəqibimiz Bakıdakı oyunla müqayisədə bu gün daha yaxşı təsir bağışladı. Təbii ki, azlıqda qalmağımız oyunumuza təsir etdi. On nəfərlə mübarizə aparmaq, oyunun tempini saxlamaq çətindir.  Düşünürəm ki, futbolçularımı tənqid etməyə ehtiyac yoxdur. Açıq-aşkar hiss olunur ki, onlara təcrübə toplamaq lazımdır".