Cordan Rezabala: “Sumqayıt” son 7 turda avrokuboklar üçün döyüşəcək”

“Sumqayıt”ın yarımmüdafiəçisi Cordan Rezabalanın Futbolxeber.az saytına müsahibəsi

- Azərbaycan Premyer Liqasının 19-cu turunda səfərdə “Neftçi” ilə bərabərə qaldınız (1:1). Bu nəticəni necə şərh edərdiniz?

- Yaxşı oyun sərgilədik. Mübarizə dolu matç keçdi. Qarşılaşdığımız rəqibin gücündən xəbərdar idik. Bizi dəstəkləməyə gələnlərə təşəkkürümü bildirirəm. "Neftçi"yə qarşı yaxşı oyun göstərə bildik. Komanda şəklində inamlı çıxış etdik. Amma özümüzü inkişaf etdirməyə davam etməliyik. Komanda olaraq bu mövsüm yaxşı oynayırıq. Bu qarşılaşmada biz üstün tərəf idik.

- Hesabda öndə olsanız da, qələbəni əldən verdiniz. İtirilən iki xalı nə ilə əlaqələndirmək olar?

- Oyun ərzində bəzi qol fürsətlərini qaçırdıq. Düşünürəm ki, yaxaladığımız epizodları daha yaxşı dəyərləndirməliyik. Oyundan oyuna inkişaf edirik. Dayana bilmərik. Əlimizdə olan imkanlardan istifadə etməliyik. Sona qədər mübarizəmizi davam etdirəcəyik. Çalışacağıq ki, "Sumqayıt" güclülər sırasında olsun.

- Növbəti turda "Zirə" ilə qarşılaşacaqsınız. İkinci yer uğrunda mübarizədə mühüm əhəmiyyət kəsb edən bu matçdan gözləntiləriniz nədir?

- Necə oynayacağımızı bilirik. Rəqibin də güclü olduğunu dərk edirik. Komanda şəklində bu oyuna fokuslanırıq. "Zirə" ilə qarşılaşmada qələbə qazanmalıyıq. Hər kəs bunun üçün əlindən gələni edəcək. İndidən deyə bilərəm ki, bizi olduqca maraqlı bir matç gözləyir.

- “Sumqayıt”ı yayda avrokuboklarda görə biləcəyik?

- Əlbəttə, bunu çox istəyirik. Hədəf məhz budur. Bir ara ikinci pilləyə yüksəldik. Sonradan bəzi oyunlarda bu mövqeyi əldən verdik. Amma son 7 turda məhz avrokuboklar üçün döyüşəcəyik. Matçların necə nəticələnəcəyini deyə bilmərəm. Amma cümə günü "Zirə" ilə matçda qələbə qazanıb mübarizəmizi davam etdirəcəyimizə inanıram.

- “Sumqayıt”a qış fasiləsindən sonra qoşuldunuz. Azərbaycan Premyer Liqasının səviyyəsi sizi qane edir?

- Maraqlı, gərgin çempionat keçir. Çempion məlum olsa da, iddialı komandaların sayı çoxdur. Eyni zamanda 5-6 komanda medallar uğrunda mübarizə aparır. Bu, müsbət məqamdır.

- “Sumqayıt”dakı durumunuz sizi qane edir?

- Bəli, hər şey yaxşıdır. Klubda hər kəs məni çox yaxşı qarşıladı. Buna görə onlara minnətdaram. Mən də əlimdən gələni edəcəm ki, “Sumqayıt”a faydam dəysin.

Azad NURİYEV