AZAL-dan 75-ci ev qələbəsi

AZAL Azərbaycan çempionatlarında 75-ci ev qələbəsini qazanıb. Paytaxt təmsilçisinin yubiley uğuru Topaz Premyer Liqasının XVI turuna təsadüf edib. Futbolxeber.az-ın məlumatına görə, “Xəzər Lənkəran”ı 1:0 hesabı ilə məğlub edən bakılılar doğma azarkeşləri önündə 75-ci dəfə 3 xal qazanıb. AZAL buna öz meydanındakı 157-ci qarşılaşmada nail olub. Hesabında 41 heç-heçə və 41 məğlubiyyət olan “təyyarəçilər” Murad Səttarlının qolu ilə yubiley qələbəsinə sevinib. Evdə 212-ci qolu vuran paytaxt təmsilçisi 139 top buraxıb.

Güclülər dəstəsində 2005/06 mövsümündə debüt edən AZAL ilk ev qələbəsini “Olimpik” adlandığı vaxt qazanıb. Bu, komandanın öz meydanında keçirdiyi 9-cu matça təsadüf edib. 2006-cı il martın 12-də bakılılar “Göyəzən”i 2 cavabsız qolla məğlub edib.

AZAL-ın ev qələbələri mövsümlər üzrə: 2005/06 - 2, 2006/07 - 9, 2007/08 - 10, 2008/09 - 7, 2009/10 - 5, 2010/11 - 10, 2011/12 - 9, 2012/13 - 10, 2013/14 - 4, 2014/15 - 5, 2015/16 - 4.

Paytaxt klubu öz meydanında 22 komandanı məğlub edib: “Turan” - 8, “Bakı” - 7, “Kəpəz”, “Neftçi”, “Qəbələ”, “Simurq”, “Sumqayıt”, “Xəzər Lənkəran” - 5, “İnter”, “Karvan”, “Rəvan”  4, “Muğan”, “Qarabağ” - 3, “Gənclərbirliyi”, MOİK, “Standard” - 2, ABN, “Bakılı”, “Göyəzən”, “Masallı”, “MKT-Araz”, “Şahdağ” - 1.

Premyer Liqada “Olimpik” və “Olimpik-Şüvəlan” adları altında da çıxış edən AZAL evdə 75 və daha çox qələbə qazanan 10-cu komanda kimi tarixə düşüb. Öz meydanında ən çox qələbə qazanan komanda “Qarabağ”dır - 220 dəfə. “Neftçi”nin 218 belə qələbəsi var.