Şahin Diniyev: “Rəqibə hörmətsizlik olmasın, amma deyim ki...”

Topaz Premyer Liqasının XIV turuna bu gün keçirilən “Kəpəz” - “İnter” oyunu ilə start verilib. Futbolxeber.az-ın məlumatına görə, gərgin keçən görüşdə qapılara qol vurulmayıb. Oyundan sonra keçirilən mətbuat konfransında hər iki komandanın baş məşqçisi matçla bağlı fikirlərini açıqlayıblar:

Zaur Svanadze (“İnter”in baş məşqçisi): “Bu cür meydançada baxımlı oyun sərgiləmək çox çətindir. Əgər  penaltidən yararlana bilsəydik, hadisələrin axarı başqa cür olacaqdı. Ümumi götürsək, hər iki komanda döyüşdü. Səfərdə qazanılan xalı pis nəticə hesab etmirəm. Klubda maliyyə durumu normallaşır. Futbolçular sentyabr və oktyabr ayları üçün nəzərdə tutulan maaşlarını alıblar, digər ayların  maaşları da vaxtında ödəniləcək”. 

Şahin Diniyev (“Kəpəz”in baş məşqçisi): “Meydançanın durumu baxımlı oyun sərgiləməyimizə imkan vermədi. Komandama oyunun ritmini tutduğuna görə təşəkkür edirəm. Düşünürəm ki, ikinci hissə bizim üstünlüyümüz şəraitində keçdi. Sadəcə, bəxtsizlik və rəqibin qapıçısı Səlahət Ağayevin gözəl oyunu bizi qələbədən məhrum etdi. Rəqibə hörmətsizlik olmasın, amma deyim ki, biz bu gün 2 xal itirdik. “İnter”in penaltidən başqa hər hansı bir ciddi qol şansı olmadı. Bu görüşü unutmalı və növbəti oyunlara hazırlaşmalıyıq.  Əsas odur ki, komandamız yaxşı futbol sərgiləyir və ümidlərim böyükdür”.