Spaletti Kənan Yıldızı təriflədi

“Yuventus”un aparıcı futbolçusu Kənan Yıldız bu gün UEFA Çempionlar Liqasının Liqa mərhələsinin 4-cü turunda “Sportinq”ə qarşı keçiriləcək matçda forma geyəcək.

Futbolxeber.az saytının məlumatına görə, bu barədə Turin klubunun baş məşqçisi Luçano Spaletti bildirib.

Təcrübəli mütəxəssis türkiyəli ulduz haqda müsbət fikirlər səsləndirib: “Bəxtim gətirib ki, karyeram ərzində bir çox görkəmli futbolçularla çalışmışam. Yıldız da yüksək səviyyə nümayiş etdirir. Ondan meydanda hansı mövqedə özünü daha yaxşı hiss etdiyini soruşdum. Kənan isə cavab verdi ki, sol mərkəz hücumçusu kimi oynamağa üstünlük verir. O, həm ikinci hücumçu, həm də cinahda yaxşı olduğunu söylədi”.

Qeyd edək ki, zədə səbəbindən A seriyasının son turunda “Kremonoze” ilə görüşdə forma geyməyən Kənan Yıldız, bu mövsüm bütün turnirlər nəzərə alınmaqla meydana çıxdığı 13 oyunda 3 qol vurub, 4 dəfə məhsuldar ötürmə müəllifi olub.