Joni Montiel: “Kim deyir ki, “Qarabağ” çempionluqdan əlini üzüb?”

“Qarabağ”ın yarımmüdafiəçisi Joni Montielin Futbolxeber.az saytına müsahibəsi

- Azərbaycan kubokunun yarımfinal mərhələsinin ilk oyununda “Sabah”la bərabərə qaldınız. 2:2-lik heç-heçəni necə şərh edərdiniz?

- Çətin matç alındı. Olduqca gərgin görüş keçdi. Bununla belə, nəticəyə baxmayaraq, yaxşı oyun sərgilədik. Hər şey ikinci matçda məlum olacaq.

- Ardıcıl ikinci dəfə “Sabah”la ev oyununda məhsuldar heç-heçə qeydə alındı. Qələbə üçün nə çatışmır?

- Düşünürəm ki, sonuncu matçda daha yaxşı çıxış edən tərəf biz idik. Həqiqət budur ki, əlimizə düşən fürsətləri düzgün dəyərləndirmədik. Futbol belə bir oyundur. Cərimə meydançasında rəqibi həyəcanlandıra bilirdik. Növbəti matça qələbə əzmi ilə çıxacağıq.

- Cavab matçından gözləntiləriniz nədir?

- İkinci oyuna da yüksək əhval-ruhiyyədə çıxacağıq. Cavab matçında qələbə qazanmağa çalışacağıq. Komandamız yüksək səviyyədə çıxış edir. Düşünürəm ki, indi Çempionlar Liqasında olduğu kimi çox oyun keçirməməyimiz bizə fayda verəcək. Çünki bədənin istirahətə ehtiyacı olur. Çox uzun səfərlər edirdik və indi bütün diqqətimizi kuboka və liqaya yönəltmişik. Hazırda bizim üçün ən vacibi bu turnirləri yüksək nəticə ilə başa vurmaqdır.

- Matçın hakimləri barədə hansı fikirdəsiniz? Onların idarəçiliyindən razı qaldınız?

- Heç bir şey demək istəmirəm. Bu barədə danışmamağı üstün tuturuq. Hakimlərə hörmət edirik və belə bir matçı idarə etməyin çətin iş olduğunu bilirik. Yalnız öz oyunumuza diqqət yetirməliyik.

- Çoxları düşünür ki, “Kəpəz”ə məğlub olduqdan sonra “Qarabağ” çempionluqdan əlini üzüb...

- Xeyr, kim deyir ki, biz çempionluqdan əlimizi üzmüşük? Biz "Qarabağ"ıq, iddialı olmalıyıq. Matçlara pozitiv yanaşmaq lazımdır. Qarşıda hələ oyunlarımız var. Biz xallar əldə edə bilirik. Düzdür, indi çempionluğumuz birbaşa bizdən asılı deyil. Lakin qarşıdakı oyunlardan sonra baş verəcəkləri birlikdə görəcəyik.

- Yəni düşünürsünüz ki, "Qarabağ"ın Premyer Liqanı qazanmaq üçün şansları qalır?

- Əlbəttə. Buna şübhə etmirik. Dediyim ki, qarşıda matçlar var. Hələ heç nə başa çatmayıb. Biz çempionluq üçün döyüşəcəyik.

Azad Nuriyev