Qurban Qurbanov: “İstəyirəm ki, media və azarkeşlər hər zaman mənə güvənsinlər”

“Futbolçuların istirahətə ehtiyacı var idi. Toral Bayramov və Aleksey Kaşuk xəstələndikləri üçün toplanışa gec qoşuldular”.

Futbolxeber.az saytının məlumatına görə, bu sözləri "Qarabağ"ın baş məşqçisi Qurban Qurbanov bu gün keçirdiyi mətbuat konfransında deyib.

Təcrübəli mütəxəssis Antalya toplanışında yoxlama oyunlarında qarşılaşacaqları rəqiblərin zəif olmadığını bildirib: “Bütün futbolçulara şans verəcəyik. Çox enerji sərf etmək istəmirik. Müəyyən çatışmazlıqlar var idi, bunu məşqlərdə yoluna qoymağa çalışdıq. Heç bir futbolçudan narazı deyiləm. Artıq liqamızda bizə təhlükə yaradan kollektivlər var. Bu, çox sevindirici haldır".

O, “Qarabağ”ın futbolçularına olan maraqdan da söz açıb: “Ən çox maraq yerli futbolçularadır. Menecerlər tez-tez əlaqə saxlayırlar. Konkret kimin gedəcəyi və ya qalacağı bəlli deyil. Bu, Marko Yankoviçə də aiddir”.

Qurbanov bütün mövqeləri gücləndirmək istədiklərini vurğulayıb: “Bəzi mövqelərdə futbolçu sayını artırmaq istəyirik. Çünki il ərzində oyun sayı çox olur. Bu, həm oyunumuza, həm də məşq prosesimizə müsbət təsir edəcək. Çempionlar Liqasına görə transfer etmək istəmirik. Gələcək üçün çalışırıq".

Mütəxəssis futboldan uzaq qalmağının mümkün olmadığını söyləyib: “İstəyirəm ki, media və azarkeşlər hər zaman mənə güvənsinlər. Futboldan uzaq qalmaq mümkün deyil. Hara getsəm, məğlub olduğumuz oyunlar haqqında, niyə dəyişiklikləri vaxtında etmədiyimi soruşurlar”.