Füzuli Məmmədov: “Rəhbərlik bu yöndə bizə lazımi dəstəyi göstərir”

“Karvan-Yevlax”ın baş məşqçisi Füzuli Məmmədovun Futbolxeber.az saytına müsahisəbi

- Artıq bu gündən mövsümün ikinci hissəsi üçün məşqlərə başlayırsınız. Hazırlıq planları necədir?

- Bəli, bu gündən məşqlərimiz başlayır. Sabahdan isə tam heyətlə hazırlıq keçəcəyik. Planımız tutulub və ona uyğun iki yoldaşlıq oyunumuz olacaq. Hazırlığın son həftəsini isə rəsmi oyunlara necə hazırlaşırıqsa, o cür məşq edəcəyik.  

- Komanda Yevlaxda məskunlaşacaq. Oradakı şərait istədiyiniz kimi hazırlıq keçməyə imkan verir?

- Hazırlığımız Yevlaxda keçəcək. Bilirsiniz ki, bir müddət əvvəl yeni bazamıza köçmüşük. Burada çox yaxşı şərait var. Komanda üçün lazımi şərait yaradılıb. Yəni qış fasiləsində burada istədiyimiz kimi hazırlaşa biləcəyik. Heç bir narazıçılığımız yoxdur.  

- Səid İranxan ilə yolları ayırdınız. Ondan başqa gedən olacaq?

- Bəli, İranxanla yollarımızı ayırmışıq. Ona gələcək karyerasında uğurlar arzulayırıq. Hələlik başqa hansısa futbolçu ilə vidalaşmaq fikrimiz yoxdur. Əlimzidə olan heyətlə yolumuza davam edəcəyik.

- Məlum məsələdir ki, heyət güclənməlidir. Transferlərlə bağlı nə kimi yeniliklər var? Mətbuatda Samir Abdullayevlə anlaşdığınız barədə xəbər yayılıb...

- Danışıq apardığımız futbolçular var. Lakin hələlik kiminləsə razılıq əldə olunmayıb. Buna görə də ad çəkmək istəməzdim. Dediyim kimi, razılıq əldə olunsa, dərhal bu barədə məlumat verəcəyik.

- Premyer Liqada qalmaq baxımından qış fasiləsindən necə yararlanmaq çox önəmlidir. Rəhbərlik planlarınızı tam həyata keçirmək üçün sizə şərait yaradıb?

- Rəhbərliklə daim ünsiyyətdəyik. Hazırda əsasən yerli futbolçularla güclənmək istəyirik. Daha çox onlara diqqət edirik. Rəhbərlik bu yöndə bizə lazımi dəstəyi göstərir.

İbrahim Cəfərov