Anton Krivotsyuk: “Sabah ən yaxşı oyunumuza şahid olacaqsınız”

Azərbaycan milli komandasının müdafiəçisi Anton Krivotsyuk DÇ-2026-nın seçmə mərhələsinin 5-ci turunun İslandiya ilə matçından əvvəl keçirilən mətbuat konfransında iştirak edib.

Futbolxeber.az saytının məlumatına görə, təcrübəli müdafiəçi sabah ən yaxşı performansı göstərəcəyinə inandığını qeyd edib:

"Rəqibi yaxşı tanıyırıq, onlar güclü komandadır. Heyətlərində keyfiyyətli və performansı yüksək olan futbolçular yer alır. Bunu nəzərə alaraq, bizi çətin qarşılaşma gözlədiyini bilirik. Lakin oyuna ciddi şəkildə hazırlaşmışıq və inanıram ki, sabah ən yaxşı oyunumuza şahid olacaqsınız. İnanıram ki, sabah ən yaxşı performansımızı göstərəcəyik".

O, baş məşqçi Ayxan Abbasovun gəlişindən sonra komandada baş verən dəyişikliklərlə bağlı sualı belə cavablandırıb:

"Çox şey dəyişməyib, amma Ayxan müəllimin gəlişindən sonra komandada milli ruh və möhkəm kollektiv formalaşıb. Hər birimiz yaxşı nəticələr qazanmaq üçün çalışırıq və bunun məsuliyyətini dərk edirik. İnanıram ki, sabah da bunu meydanda göstərəcəyik".