“Sumqayıt” azarkeşlərindən açıqlama: “Bizə heç kim göstəriş verməyib”

"Sumqayıt"ın "UltraSumqayıt" və "Kimyaçılar" azarkeş qrupları açıqlama yayıblar.

Futbolxeber.az saytının məlumatına görə, fan klublar Azərbaycan Premyer Liqasının 16-cı turunda "Neftçi" ilə oyunda rəqib baş məşqçi Samir Abasovun əleyhinə səsləndirdikləri şüarlarla bağlı məsələyə aydınlıq gətiriblər.

Belə ki, fanatlar sosial şəbəkə hesablarında etdikləri paylaşımda klub və ya bir başqası tərəfindən göstəriş almadıqlarını, hər hansı sifarişi yerinə yetirmədiklərini bildiriblər.

"UltraSumqayıt"ın açıqlamasında deyilir: “Klub tərəfindən Samir Abasova qarşı hər hansısa təklif və ya fikir bildirmək barədə bizə heç bir söz deyilməyib. Anlamayanlar üçün bir daha vurğulayırıq ki, "UltraSumqayıt" AZAD AZARKEŞ QRUPUDUR və nə kiminsə göstərişi, nə də tapşırığı əsasında fəaliyyət göstərir”.

“Kimyaçılar”ın açıqlamasında isə bu fikirlər yer alıb: “Klub tərəfindən Samir Abasova qarşı hər hansı təklif və fikir bildirilməyib. Samir Abasov haqda səslənən şüarlar özümüzə məxsusdur”.