Rəşad Sadıqov: “Sabah komandamdan baxımlı oyun gözləyirəm”

“İlk oyunda böyük hesabla məğlub olmuşuq. Matça fərqli atmosferdə, ab-havada hazırlaşmaq istəyərdik. Hələ də məyusluğumuz var. Sabah əlimizdən gələni edəcəyik ki, nəticə bizim üçün pozitiv olsun. Qələbə qazanmaq çox vacibdir. Son oyuna qədər avrokuboklarda çıxışımız uğurlu alınırdı. Sabah komandamdan əzmkar, aqressiv, baxımlı oyun gözləyirəm”.

Futbolxeber.az saytının məlumatına görə, bu sözləri "Zirə"nin baş məşqçisi Rəşad Sadıqov UEFA Konfrans Liqası pley-off mərhələsinin cavab görüşü çərçivəsində sabah Bakıda Kiprin "Omoniya" klubuna qarşı keçiriləcək görüşdən öncə təşkil olunan mətbuat konfransında deyib.

Mütəxəssis üç gün ərzində iki məğlubiyyət aldıqlarını xatırladıb: “Həmin oyunlardan gözləntilərimiz o deyildi. Amma futbolun gözəlliyi ondadır ki, hər şey sənin gözlədiyin kimi olmur. "Omoniya" ilə matçda buraxdığımız qollara baxanda görürsən ki, bu, biz deyildik. Həmin gün bizim üçün bu mövsümün ən uğursuz oyunu oldu. Ola bilər ki, rəqib bizdən daha yaxşı oynayırdı. Amma görünür ki, həyəcan, erkən buraxılan qolların məyusluğu təsir etdi. Kollektiv olaraq həmin oyunları unutmuşuq, önümüzə baxırıq. Məyusluğun olması normaldır. Tam olaraq sabahkı oyuna köklənirik. Qələbə qazanmaq çox vacibdir. Əlimizdən gələni edəcəyik ki, ilk oyundakı nəticəni unutduraq”.

“Sabah möcüzəyə inanırsınız?” sualını R.Sadıqov belə cavablandırıb: “Əsas düşüncəmiz ondan ibarətdir ki, hər top uğrunda mübarizə aparaq. Hər şey bizim üçün uğurlu alınsa, sona qədər mübarizə aparmaq istəyirik”.

Pley-offa yüksəlməyi məşqçilik karyerasında zirvə hesab etməsi barədə fikrə “Zirə”nin baş məşqçisi belə münasibət bildirib: “Çempionatda ikinci yer də asan əldə olunmadı. Rəqiblərimizin hansı səviyyədə olduğunu nəzərə almaq lazımdır. Düşünürəm ki, həm Premyer Liqada ikinci yer, həm də pley-off məşqçilik karyeramın zirvəsidir”.

Sadıqov bu gün UEFA Çempionlar Liqasının pley-off mərhələsi çərçivəsində "Qarabağ"ın "Dinamo" ilə oyunda şanslarını bərabər dəyərlənirib: “Qarabağ” səfərdə qələbə qazansaydı da, belə dəyəcəkdim. Vacib olan səfərdəki oyunu təkrarlamaqdır. Rəqibin necə oynayacağından da çox şey asılıdır. Bir çox insanlar kökləniblər ki, ilk qolu 15-20-ci dəqiqədə vurmaq lazımdır. Amma "Qarabağ" 60-cı dəqiqədə fərqlənsə belə, oyunu çevirmək şansı olacaq. Onlara uğurlar arzulayıram”.