İvan Brkiç: “Azarkeşlərimizə avrokubok sevinci bəxş etməliyik”

“Səbail”lə oyunda qazandığımız 3 xalın komandamız üçün nə qədər əhəmiyyətli olduğunu bilirdik. Oyundan öncə yalnız qələbə barədə düşünürdük. 3:0 hesablı nəticəni "Neftçi" üçün uğurlu sayıram”.

Futbolxeber.az saytına müsahibəsində bu sözləri “Neftçi”nin qapıçısı İvan Brkiç Azərbaycan Premyer Liqasının 35-ci turunda “Səbail”i 3:0 hesabı ilə məğlub etdikləri oyundan sonra deyib.

Xorvatiyalı qolkiper qeyd edib ki, süni ot örtüyünün yaratdığı çətinliyə baxmayaraq, yaxşı çıxış ediblər: “Oyunun ilk hissəsində meydançaya öyrəşmək baxımından bir qədər çətinlik yaşadıq. İkinci hissədə yaxşı iş görərək qolları sıralaya bildik”.

O, mütləq avrokuboklara vəsiqə qazanmalı olduqlarını vurğulayıb: “Qarşımızda bir tapşırıq var. Biz buna nail olmalıyıq. Artıq komanda olaraq bu yolun sonundayıq. "Sabah"la matça ciddi hazırlaşıb missiyanı uğurla tamamlamalıyıq”.

İ.Brkiç uzun müddət sonra Premyer Liqa matçında meydana çıxmasından da söz açıb: “Xeyli vaxt zədədən əziyyət çəkdim. Mövsümün demək olar ki, yarısını kənarda qaldım. Futbolda belə hallar olur. Bəzən zədələrdən əziyyət çəkirsən və meydana çıxa bilmirsən. Müəyyən vaxtlarda başıma niyə belə şeylər gəldiyi üçün təəssüflənirdim. Həyata pozitiv baxmaq lazımdır. "Qarabağ"la matçlarda xoş anlar yaşanmasa da, bugünkü qələbə və quru oyun keçirmək olduqca fərqli hisslərdir. "Səbail"ə qarşı tamamilə fərqli "Neftçi" mübarizə apardı. Öz təcrübəmlə komandama həmişə kömək etməyə çalışıram”.

29 yaşlı qapıçı mövsümün son turunda “Sabah”a qarşı keçirəcəkləri matç barədə də fikirlərini bölüşüb: “Ümid edirik ki, matçı qələbə ilə yekunlaşdıracağıq. Rəqibə hörmətlə yanaşırıq. Onlar təcrübəli heyətə, məşqçiyə sahibdirlər. "Sabah"a qarşı var gücümüzlə döyüşəcəyik. Qələbə qazanıb azarkeşlərimizi sevindirmək, onlara avrokubok sevinci bəxş etməliyik. "Neftçi"ni sevən hər kəs buna layiqdir. "Sabah"la oyuna fokuslanmalı, 90 dəqiqəni inamlı mübarizə aparmalıyıq. Hər şey bizdən asılıdır. Premyer Liqada neçənci yeri tutmağımız öz əllərimizdədir. Özümüzü necə göstərəcəyiksə, o cür də nəticəyə sahib olacağıq”.

Azad NURİYEV