19 Mart 2024, Çərşənbə axşamı
“Ağ-qaralar”ın “Black Friday”i
"Qarabağ" və "Sabah" qalib gəldi
Orxan Əliyev: “Heyif o epizodlardan...”
Sxadadze: “Təzyiq böyükdür”

Ölkə futbolu

Belə danışmaqdansa... (QEYD)

ATALAR ƏBƏS YERƏ DEMƏYİBLƏR, SUSMAQ QIZILDI

Ötən həftəsonu Azərbaycan futbolu üçün uğursuzluqla yadda qaldı. Əvvəlcə “Qarabağ” səfərdə qələbə qazanmasına (2:1) baxmayaraq, öz meydanında APOEL-dən 2 cavabsız qol buraxaraq Çempionlar Liqasında mübarizəni dayandırdı. Daha sonra isə “Neftçi” İsraildə “Bney Yehuda”ya məğlub olaraq Avroliqayla vidalaşdı. Hər 2 qarşılaşmadan sonra təmsilçilərimizin uğursuzluğa düçar olması barədə kifayət qədər danışılıb. Bizim toxunmaq istədiyimiz məqam başqadır.

Xatırlayırsınızsa, “Dandalk”la cavab oyunundan sonra “Qarabağ”ın vitse-prezidenti Tahir Gözəl “Bu, tarixin ən güclü “Qarabağ”ıdır” açıqlamasını vermişdi. Hələ həmin vaxt bu fikir ciddi qəbul olunmamışdı. Elə APOEL-dən Bakıda alınan 0:2 hesablı məğlubiyyət də Gözəlin açıqlamasının nə qədər yanlış olduğunu göstərdi. Çempionlar Liqasında pley-offa belə yüksələ bilməyən hazırkı heyət necə tarixin “ən güclü “Qarabağ”ı ola bilər?

Ümumiyyətlə, “Qarabağ”ın vitse-prezidentinin açıqlamalarında bir məqam diqqətimizi çəkib. Tahir Gözəl demək olar ki, hər fürsətdəcə, nəticədən asılı olmayaraq diqqəti maliyyəyə yönəldir. APOEL-lə oyundan sonra jurnalistlərin yeni transferlə bağlı sualına klub rəhbəri belə cavab verib: “Xeyr, bunun üçün infrastruktur, gəlir olmalıdır. “Qarabağ”ın sponsordan başqa gəlir yeri yoxdur. Avropa klubları kimi futbolçu alıb, sata bilmirik... “Qarabağ”ı “Azersun” şirkəti himayə edir. İmkanlarımız nəyə çatır, yavaş-yavaş gedirik. Bundan artığına imkan yoxdur”.

Tahir Gözəlin bu açıqlaması kifayət qədər təzadlıdır. Birincisi, son illər “Qarabağ” Avropadakı uğurlu çıxışı sayəsində UEFA-dan heç də az olmayan vəsait əldə edir və bu məbləğ klubun 1 illik büdcəsinin böyük bir hissəsini təşkil edir. “Azersun”un Ağdam klubuna ayırdığı məbləğ elə də böyük deyil. Üstəlik də, lap həmin məbləğ böyük olsa belə, Tahir bəyin bundan gileylənməyi düzgün olmaz. Çünki “Azersun” şirkətinin qazandığı vəsait kifayət qədərdir və həmin pulla 1 deyil, yeri gəlsə 5 komandada saxlamaq olar.

Digər tərəfdən də hələ bir neçə il öncə “Qarabağ” Avropa səviyyəli klubdur” deyən T.Gözəlin indiki açıqlaması Avropa səviyyəli klubun rəhbərinə nə dərəcədə uyğundur? Siz hansısa Avropa səviyyəli klubun rəhbərinin “İmkanımız buna çatır” deməsinə şahid olmusuz?

Ötən il BATE ilə oyundan öncə müsahibəsində Tahir Gözəl Riçard Almeydanın mümkün qayıdışı ilə bağlı sualı belə cavablandırmışdı: “Riçard kimi futbolçuları Azərbaycana gətirmək çətindir. Klubun büdcəsi buna icazə vermir”.

Göründüyü kimi, “Qarabağ”ın vitse-prezidenti hər imkanda klubun büdcəsinin azlığından şikayətlənir.

Bir neçə il əvvəl “Yanq Boyz”la oyundan sonra zarafatca “Rövnəq Abdullayevdən mükafat gözləyirik” deyən Tahir bəy unutmamalıdır ki, məhz “Qarabağ”ın qazandığı uğurlar sayəsinə “Azərbaycanda idmanın inkişafında xidmətlərinə görə” dövlət başçımız tərəfindən “Azərbaycan Respublikası Prezidentinin fəxri diplomu” ilə təltif edilib, “Azersun”dakı fəaliyyətinə görə yox.

“Qarabağ”ın ardınca Avropa səhnəsində məğlubiyyətlə üzləşən “Neftçi”nin rəhbərliyində yer alan şəxslər əvvəlcə “Bney Yehuda” ilə oyundan sonra danışmadıqlarına görə tənqid olundular. Çox keçmədi və məlum oldu ki, “ağ-qaralar”ın prezidenti Kamran Quliyev İsrailə apardıqları media nümayəndələrinin suallarını cavablandırıb. K.Quliyevin müsahibəsində ən çox müzakirə olunan məqam dediyi “Bizim üçün ən minumum "Sperantsa"nı keçmək idi” cümləsidir.

Klub rəhbərinin bu açıqlaması istər azarkeşlər, istər sosial şəbəkə istifadəçiləri arasında geniş müzakirə olundu. Kamran Quliyev növbəti cümlələrdə fikrini əsaslandırmağa çalışsa da, transferlərə və mükafatlara ayrılan pulu nəzərə almasaq, aylıq büdcəsi 800 min manat (təxminən yarım milyon dollar) olan klubun prezidenti “Bizim üçün ən minumum "Sperantsa"nı keçmək idi” deməməlidir. Xüsusən də bu klub “Neftçi”dirsə. Bunu “Səbail”in, “Sumqayıt”ın prezidenti deyə bilər, amma “Neftçi”nin rəhbəri yox.

Halbuki “Neftçi”yə tarixi ərzində ən böyük uğurları qazandıran prezident - Sadıq Sadıqovun dövründə məğbluyyətdən sonrakı ab-hava fərqli olurdu. Bir neçə il əvvəl Avroliqanın pley-offunda evdə “Partizan”dan alınan məğlubiyyətdən sonra klubdakılar utandıqlarından heç adam içinə çıxmırdılar, prezidentdən tutmuş klubun sıravi əməkdaşına qədər. İndi isə “Neftçi” sanki üçüncü mərhələdə mübarizəni dayandırmağa sevinir...




Şərh yazılmayıb
ŞƏRH YAZ
Adınız, Soyadınız *  
E-mail    
Təhlükəsizlik kodu    
Kodu daxil edin *  







Arxiv

Mart 2024
B.eÇ.aÇC.aCŞB
01 02 03
04 05 06 07 08 09 10
11 12 13 14 15 16 17
18 19 20 21 22 23 24
25 26 27 28 29 30 31