Çeferindən finalın İstanbuldan alınması ilə bağlı açıqlama

UEFA-nın prezidenti Aleksander Çeferin bu mövsüm Çempionlar Liqasının finalına ev sahibliyinin İstanbuldan alınması və Portuqaliyaya verilməsi ilə bağlı fikirlərini bölüşüb. Futbolxəbər.az saytının məlumatına görə, o, qurumun saytına açıqlamasında bununla bağlı deyib: “Azarkeşlər komandalarını canlı olaraq görə bilmədikləri üçün bir ildən çox əziyyət çəkdilər və Çempionlar Liqasının finalına çıxmaq klub futbolunun zirvəsidir. Azarkeşləri matçı görmək fürsətindən məhrum etmək qəbuledilməzdir, kompromis tapdığımız üçün çox şadam. Portuqaliyadakı dostlarımızdan kömək istəmişdik. Hər zaman olduğu kimi Portuqaliya Futbol Federasiyasına və hökumətə matçın qısa müddətdə təşkil edilməsinə razılıq verdiyinə görə minnətdaram. Finalın təxirə salınmasında çətinliklər böyükdür, İngiltərə Futbol Federasiyası və səlahiyyətlilər oyunun İngiltərədə keçirilməsi üçün hər cür səy göstərdilər. Onlara təşəkkür edirəm. İngilis hökumətinin Türkiyəni qırmızı zonaya daxil etmək qərarının, vətəndaşların koronavirus yayılmasından qorunması üçün ən yaxşı addım olduğu ilə razıyıq. Mən finalın çətin bir dövrdən sonra Avropada futbolun dirçəlişi üçün ümid simvolu olacağına inanıram". Çeferin gələcəkdə ÇL-in finalının İstanbulda keçirilməsi variantı haqda da danışıb: "Türkiyə Futbol Federasiyası və nümayəndələr UEFA-nın oyunların azarkeşlərlə keçirilməsi üçün səy göstərməsindən xəbərdardır. Son iki ildə İstanbulu finala müvəffəqiyyətlə hazırladığı üçün UEFA bu qərara görə təəssüflənir. UEFA bu özəl durumda göstərdiyi anlayışa görə Türkiyəyə minnətdardır. Gələcəkdə Çempionlar Liqasının finalının və bir çox turnirin İstanbulda və Türkiyədə keçiriləcəyinə ümid edirəm". Qeyd edək ki, ÇL-in finalında mayın 29-u "Mançester Siti" və "Çelsi" qarşılaşacaq.