Tofiq Bəhramovun xələfləri

Mundialda 64 oyunu altı qitədən 25 baş hakim idarə edəcək. DÇ-2014 meksikalı Marko Rodrigez üçün üçüncü, özbək Ravşan İrmatov, yapon Yuiçi Nişimura, salvadorlu Xoel Agilar, yeni zelandiyalı Peter O'Liri və ingilis Hovard Vebb üçün ikinci dünya çempionatı olacaq. Vebbin DÇ-2010-da final oyununu idarə etdiyini də xatırladım.

Maraqlıdır ki, DÇ-2010-da 5 matçda baş hakim olan İrmatov DÇ-2014-də 4 qarşılaşmanı idarə edəcəyi halda ümumi oyun sayına (9) görə dünya çempionatlarının təkbaşına rekordçusu olacaq.

Yeri gəlmişkən, DÇ-2014-ün baş hakimlərindən biri də türk Cüneyt Çakırdır (köməkçiləri - Bahattin Duran, Tarık Ongun). Ondan əvvəl türk referilərdən yalnız Doğan Babacan mundialda hakimlik edib. DÇ-1974-də AFR - Çili oyununda (1:0) baş hakim olan Babacan dünya çempionatları tarixinə ilk qırmızı vərəqə göstərən referi kimi düşüb.

Həmyerlimiz Tofiq Bəhramovun iki dünya çempionatında (DÇ-1966, DÇ-1970) hakimlik etdiyini, həmçinin DÇ-1966-nın final oyununda köməkçi hakim olduğunu da xatırladım.

Rasim MÖVSÜMZADƏ