Yıldırım Demirörən Soma faciəsindən, Superkubokdan və yeni mövsümdən danışdı

Türkiyə Futbol Federasiyasının prezidenti Yıldırım Demirörən maraqlı açıqlamalar verib. Futbolxeber.az-ın Türkiyə mətbuatına istinadən verdiyi məlumata görə, Demirörən “Fənərbaxça” və”Qalatasaray” arasında oynanılacaq Superkubok matçının Manisada baş tutacağını bildirib. Görüş ya avqustun 15-də, ya da 16-da keçiriləcək. TFF başqanı həmçinin 2014/15 mövsümündə Türkiyə Kubokunun final matçının Bursada keçiriləcəyini qeyd edib: “Somada yaşanan faciədə vəfat edənlərə Allahdan rəhmət diləyirik. Keçmiş olsun. Yaraların sağalması üçün bəzi qərarlar qəbul etdik. Öncəliklə Superkubok matçı Manisada oynanılacaq və bütün gəlirlər Somada şəhid olanların ailəsinə veriləcək. Bundan başqa həmin ailələrə biz də 5 milyon TL bağışlayacağıq. Fatih Terim, milli komandamız və idarə heyəti olaraq bizlərdə Somaya gedəcəyik. Hakimlər Komitəsi də həftə sonu oynanılacaq matçlardan əldə olunan gəliri şəhid ailələrinə bağışlayacaq”.

Növbəti mövsümlə bağlı federasiya başqanı bunları söyləyib: “2014-2015 mövsümündə Superliqa avqustun 29-da start götürüb, mayın 31-də bitəcək. Kubokun finalı 15 və ya 16 may tarixdə Bursada keçiriləcək. “Fənərbaxça”nın Superkubokda azarkeşsiz qalmağından söhbət gedə bilməz. Çünki “Fənərbaxça”ya verilən cəza Superliqa və ölkə kuboku ilə bağlıdır”.