18 May 2021, Çərşənbə axşamı
"Özümü çarəsiz hiss edirəm"
PFL sabah medalçıları müfakatlandıracaq
Azərbaycan klubları üçün 67 rəqib
Türkiyədə çempionun adı məlum oldu

Digər idman növləri

Fariz Məmmədov: “İlk döyüşdəki məğlubiyyətdən sonra Pelk ən dəyərli rəqibim oldu”

Azərbaycanı peşəkar rinqdə təmsil edən Fariz Məmmədov Avropa çempionu kimi vətənə döndü. İlk görüşdə zədə səbəbilə mübarizəni dayandırmağa  məcbur olan boksçumuz Mattias Pelklə revanş görüşündən qalib ayrılaraq WBCA və WBO versiyaları üzrə Avropa kəmərinə sahib çıxdı. Qələbə təəssüratlarını Simsar.az-la bölüşən Avropa çempionumuz gələcək planlarından danışıb. Futbolxeber.az həmin müsahibəni təqdim edir:

- Əvvəla, sizi qələbə münasibətilə təbrik edirik.  Təəssüratlarınız necədir?

- 9 aydır, bu görüşlə yaşayırdım. Çünki Mattiasla Qəbələdəki görüşdən əvvəl də ciddi məşq prosesi keçmişdim. Ötən ilin avqust ayından həmin görüşə hazırlaşmağa başlamışdım. Dekabrdakı uğursuz çıxışdan sonra da revanş üçün hazırlaşmağa başladım. Bu döyüşlə yatıb-qalxırdım. Bu müddətdə dost-tanışdan, ailəmdən uzaq düşdüm.

Döyüşə mükəmməl hazırlaşmışdım. Lakin ilk raundda qaşımdan aldığım zədə məni həyəcanlandırdı. Çünki Pelk çox təcrübəli boksçudur və o, bu zədəmdən istifadə edə bilərdi. Hazırda isə xoşbəxtəm. Ona görə ki, Pelki təslim olmağa məcbur etdim. Xoşbəxtəm, ona görə ki, peşəkar boksda WBO versiyası üzrə Avropa kəmərini qazanan ilk azərbaycanlı oldum. 2004-cü ildə “Intercontinental” çempionluğa yiyələnmişdim və böyük fasilədən sonra ondan da yaxşı titula sahib çıxdım. Boksda bu günə arzu etdiyim nailiyyəti əldə etdim.

- Qələbə üçün həlledici məqam hansı oldu?

- Mattias Pelk məni aqressiv boksçu kimi tanıyırdı. Həmişə yaxın məsafədə döyüşmüşəm. Amma bu dəfə Mattias Pelk məni tanımadı. Onun qarşısına fərqli taktikada çıxdım. Mən onu çiynindən nakauta saldım. O, boyca məndən hündür idi və əlləri uzun idi. Bu da mənə onun başına zərbə vurmağa çətinlik yaradırdı. Ona görə, qərar vermişdim, çiyninə ağrıdıcı zərbələr vurum. 4 raund ərzində istədiyim kimi döyüşdüm. Başına da zərbələr endirdim. Pelkin sifətinin, əsasən, sol nayihəsinə gözəl zərbələr vurdum. Daha sonra küncdə oturarkən Pelkin əli ilə hakimlərə mübarizəni davam etdirə bilməyəcəyi ilə bağlı işarə etdiyini gördüm. Məşqçi heyətim və mən emosiyalara qapıldıq. Sevinirdik... Artıq əlimə bayraq da almışdım. Bir az sonra rinq hakimi yaxınlaşıb dedi ki, oyun davam edir, döyüşə hazırlaş. Nələrin baş verdiyi anlamadım. Amma Pelkin də döyüşmək istəmədiyini görürdüm. Çiynini işarə edərək deyirdi ki, davam edə bilməyəcək.

- Görüşdən sonra məlum olub ki, Pelkin çiynində ağır zədəsi var və o, əməliyyat olunmalıdır. Sonradan onun səhhəti ilə maraqlandınızmı?

- Biz idmançıyıq. Yalnız rinqdə rəqib oluruq. Necə ki, mən buradakı döyüşdə uduzanda o mənə yaxınlaşıb təsəlli etmişdi, eləcə də, mən ona yaxınlaşdım, vəziyyəti ilə maraqlandım. Daha sonra məşqçi heyətimin üzvləri xəbər verdilər ki, Pelkin zədəsi çox ciddidir və əməliyyat olunmalıdır.

- Bütün rəqiblərinizə bu cür münasibət bəsləyirsiniz?

- Rəqib var, əsl idmançıdır, rəqib də var, yekəbaşdır. Mən həmişə rəqiblərimə böyük hörmət bəsləmişəm. Mətbuat konfranslarında və rinqdən kənarda mehriban və xoş münasibətlərdə olmuşam.

- Qeyd etdiniz ki, Avropa çempionu olmaq ən böyük arzunuz idi. Bəs indi planda nələr var?

- İlk növbədə, dincəlmək. Mən ötən 9 ayımı ancaq bu titula yiyələnmək üçün sərf etmişəm. Çox yorulmuşam. Dincəldikdən sonra “Qəbələ” Futbol Klubuna Avroliqada azarkeşlik edəcəyəm. Hədəflər haqqında düşünmək istəmirəm. Bunlar məni yorur...

- “Qəbələ” Futbol Klubunun hazırkı vəziyyəti heç də ürəkaçan deyil. Avroliqada mübarizəyə 1 aydan az bir müddət qalıb. Amma komanda, hələ də məşqçi tapa bilməyib. Bu vəziyyətdə hansı nəticəyə ümid edirsiniz?

- Sürprizlər gözləyirəm. “Qəbələ” buna qadirdir. Qısa bir müddətdə böyük nailiyyətlər əldə edib. Kim deyərdə ki, “Qəbələ” Azərbaycan Kubokunun finalında oynayacaq. Gördünüz, finalda da çox gözəl təsir bağışladı və yalnız penaltilər seriyasında məğlub oldu. Finaldakı atmosfer də möhtəşəm idi. Azərbaycanda hansı klubun bu qədər coşğulu azarkeşi var? Avroliqada da “Qəbələ” futbolçularından uğurlu çıxış gözləyirəm.

- İlk görüşdə məğlubiyyətin əsas səbəbi zədə oldu. Bəs rinqə çıxmazdan əvvəl bu zədəyə görə tədbirlər görülməmişdi?

- Həmin vaxt karyeramın ən yüksək formasında idim. Amma çoxları düşünürdü ki, mən yorulub mübarizəni dayandırdım. Həmin döyüşdən 20 dəqiqə əvvəl həkimlər məni xüsusi ağrıkəsici vasitələrlə masaj etmişdilər ki, döyüş vaxtı ağrıları hiss etməyim. Ancaq, bu, cəmi 2 raund oldu. Növbəti raundlarda baş qaldıran ağrılarım məni şoka saldı. Həmin görüşdə üstün tərəf mən idim. Ancaq ağrılar səbəbilə mübarizəni dayandırmalı oldum. Buna görə də, bu günə kimi özümü məğlub saymıram. Amma bunu da bəxtlə əlaqələndirirəm. Həmin vaxt Ukraynadakı hazırlıqdan sonra Azərbaycana qayıdandada ilk məşqimdə qabırğamı sındırdım, sonra əlimi əzdim, daha sonra xəstələndim... Qabırğamın sındığını da həkimlər müəyyən edə bilməmişdi. Görünür, qələbə qismətim deyilmiş.

- Ağrılar sizi taktikanı dəyişməyə məcbur etmişdi?

- Ciddi ağrılarla çıxmışdım döyüşə. Ancaq taktikanı dəyişməmişdim. Əvvəldən müəyyən etdiyim taktika ilə döyüşürdüm.

- İndiyə kimi arzu etdiyiniz, amma qarşılaşmadığınız rəqib olub?

- Xeyr.

- Bəs ən dəyərli rəqibiniz hansı olub?

- Mattias Pelk.

- İlk döyüşdə də o, belə dəyərli idi?

- Xeyr. İlk döyüşdəki məğlubiyyətdən sonra Pelk ən dəyərli rəqibim oldu. Ən güclü rəqib isə Dominikan Respublikasından Rudi Enkarnasion olub. 2004-cü ildəki döyüşdə 12 raund bir-birimizi qırmışıq.

- Sizin üçün boks tarixinin ən güclüsü kimdir?

- Mayk Tayson.

- Onu Məhəmməd Əlidən fərqləndirən nə idi?

- Məhəmməd Əli böyük boksçudur. Ancaq hərənin bir kumiri olur. Mənim də kumirim Mayk Taysondur.

- Onun hansı xüsusiyyəti sizin diqqətinizi çəkib?

- Döyüşkən ruhu. Tayson rinqə qalxanda rəqibə müharibə elan edirdi. Onun döyüşlərinə tez-tez baxıram və üslubundan çox şey öyrənmişəm.

- Azərbaycanda boks idmanının hazırkı vəziyyətindən razısınız?

- Azərbaycanda təkcə boks yox, ümumilikdə, idman sürətlə inkişaf edir. İdmana böyük qayğı var. Avropada tez-tez oluram və Azərbaycan idmanına edilən hörmət də mənə qürur verir. İdmançılara dəstək də böyükdür. Fürsətdən istifadə edib Azərbaycan Boks Federasiyasının rəhbərliyinə dərin təşəkkürümü bildirirəm. Görülən işlər göz qabağındadır. Əldə olunan nailiyyətlər də bu işlərin nəticəsidir.  Mənim uğurlarımda da federasiyanın və “Qəbələ” İdman Klubunun böyük rolu var. Qəbələdəki uğursuzluqdan sonra klubun rəhbəri mənə dəstək oldu. Mən həmin vaxt boksla vidalaşmışdım. O, məni çətin vəziyyətdən xilas etdi, ruhlandırdı. Mən də söz verdim ki, qələbə qazanacağam.




Şərh yazılmayıb
ŞƏRH YAZ
Adınız, Soyadınız *  
E-mail    
Təhlükəsizlik kodu    
Kodu daxil edin *  







Arxiv

May 2021
B.eÇ.aÇC.aCŞB
01 02
03 04 05 06 07 08 09
10 11 12 13 14 15 16
17 18 19 20 21 22 23
24 25 26 27 28 29 30
31