Cavid İmamverdiyevin hədə-qorxu gəldiyi azarkeş Futbolxeber.az-a danışdı

Cavid İmamverdiyevin "facebook" sosial şəbəkəsində hədə-qorxu gəldiyi azarkeş, Emil Nazıyev Futbolxeber.az saytına müsahibə verib.

- Emil, Cavid sosial şəbəkədə yazdığı mesajla sənə hədə-qorxu gəlib. İlk növbədə buna münasibətini bilmək istərdik.

- Mediada "onlar azarkeşdir, nə istəyirlər edə bilərlər" deyə müsahibə verib, sosial şəbəkələrdə azarkeşi hədələyən bir futbolçunu hansı klubun azarkeşi istəyər ki? O kimə güvənir? Bu azarkeş onu bu klubda görmək istəmir. Formanı çıxarıb, getsin. Münasibətim budur. Sosial şəbəkələrdə kişi olmayın, kişiliyinizi "Xəzər"lə superkubokun finalında göstərin. Monitorun arxasında şir olub, 9 nəfər "Xəzər"linin yanında dovşan olmayın. Kimdənsə çəkinmirik. Sona qədər təpkimizi qoyacağıq. Cavid və azarkeşlər arasında bilmədiyiniz çox şey var.

- Məsələn, nə?

- İndi bu haqda danışmaq istəmirəm. Vaxtı gələndə danışarıq.

- Cavid sənin özünə başqa nəsə yazıb?

- Yox, heç nə yazmayıb. Yazdığı ancaq fotodakıdı.

- Nə vaxtdan"Neftçi"yə azarkeşlik edirsən?

- Çoxdandı.

- Hansısa fanklubun üzvüsən?

- Yox, azad azarkeşəm.

- Bu vaxta qədər hansısa futbolçu və ya elə Cavidin özü ilə aranızda hansısa mübahisə olub?

- Yox. Budəfəki də təsadüfən olan işdi.

- Bu məsələyə digər azarkeşlərin münasibəti necədir?

- Mənfi. Onlar da Cavidin hərəkətini bəyənmədilər. Mən Cavidə nə söyüş, nə də təhqir yazdım. Sadəcə, adicə bir söz dedim.

- Bu məsələ ilə bağlı klub rəhbərliyinə müraciət edəcəksən?

- Yox. Mənim klub rəhbərliyi ilə heç bir işim yoxdu.

- Yaxşı, sən şikayət etmə, Cavidə heç kim "gözün üstə qaşın var" deməsin. Sonra nə olacaq?

- Bilmirəm nə olacaq.

- Belə başa düşdüm ki Cavid səni hədələdi, bununla da məsələ qapandı. Sən deyirsən ki Cavid o formanı çıxarıb, getsin. Amma klub rəhbərliyi Cavidə heç bir söz demir və həmin formanı geyməkdə davam edir...

- ...

- "Neftçi"ni növbəti oyunlarda da dəstəkləyəcəksən?

- Yox, dəstəkləməyəcəyəm.