"İllər sonra məni xatırlamağa əsas olacaq"

"İlk öncə onu qeyd edim ki, oyun bizim üçün göründüyü qədər asan keçmədi. Xüsusən ilk yarıda rəqib sona qədər döyüşür, mübarizə aparırdı. Müdafiədəki boşluqlarımızdan yararlanaraq hava toplarında bizə problem yaşadırdılar". Futbolxeber.az-ın məlumatına görə, bu sözləri "Rəvan"ın futbolçusu Xuan Manuel Varea deyib.

"Turan"la görüşdə het-trik edərək, futbol tariximizə düşən argentinalı forvard klubun rəsmi saytına verdiyi açıqlamda sözünə belə davam edib: "Fasilədə baş məşqçimiz bizimlə ciddi söhbət etdi. Onu hələ bu qədər əsəbi görməmişdim. Futbolçular öz arasında söz verdi ki, ikinci hissəni çıxıb fərqli oynayacağıq. Gördüyünüz kimi, fasilədən sonra çox yaxşı oynadıq. 5 qol vurduq, üstəlik, 3 yüzfaizli imkanı da qaçırdıq. Qollarımı qızıma həsr edirəm. Rekord etməyimi ilk dəfə eşidirəm. Belədisə çox xoşbəxtəm, adımı klub və Azərbaycan futbolu tarizinə yazdırdığıma görə. İllər sonra məni xatırlamağa əsas olacaq. Ancaq komandanın uğurunun daha vacib olduğunu da deməliyəm. Qolu kimin vurması elə də önəmli deyil. Əsası 3 xalı qazanmaqdır. İndi mən hücumçuyam deyə daha çox şans əldə edirəm. Belə epizodlardan effektiv yararlanmaq zəruridir. Bombardirlik? Yenə deyirəm, mənə komandamın uğuru daha vacibdir. Bombardir olsam da, lap yaxşı. Həm öz, həm də komandamın adına müsbət hal olardı”.