Azarkeş korteji “Neftçi”ni “Dalğa Arena”ya qədər müşayiət edəcək

Sabah Azərbaycan Premyer Liqasının son turunda “Neftçi” “Qarabağ”la çenpionluq oyununa çıxacaq.

Futbolxeber.az saytının məlumatına görə, pandemiya səbəbindən stadiondan “Neftçi”ni dəstəkləmək imkanından məhrum olan fanatlar vacib gündə komandalarını yalnız buraxmayacaqlar.

Belə ki, ölkənin 1 nömrəli azarkeş qrupu olan “Forza Neftçi” üzvləri qarşılaşmadan bir neçə saat öncə klubun bazası önünə toplaşacaqlar. Daha sonra isə azarkeş korteji “Dalğa Arena”ya qədər “Neftçi”ni müşayiət edəcək. Qarşılaşmanı stadiona yaxın məkanda izləyəcək “Forza Neftçi” qələbədən sonra “Dalğa Arena”nın önündə çempionluq qutlaması da planlaşdırır.

Xatırladaq ki, sabah “Dalğa Arena”da keçiriləcək “Neftçi” - “Qarabağ” matçı 20:30-da start götürəcək. “Neftçi” qələbə qazanacağı təqdirdə, “Qarabağ”ın hegemonluğuna son qoyub, 7 ildən sonra ilk dəfə ölkə çempion olacaq.