Sabir Buqrin: "Məşqçi dəyişikliyindən sonra hər şey yüksəlişə doğru getdi"

"Neftçi"nin futbolçusu Sabir Buqrin klub televiziyasında yayımlanan "Piramida" verilişinin qonağı olub.

 

Futbolxəbər.az saytının məlumatına görə, 24 yaşlı yarımmüdafiəçi maraqlı açıqlamaları ilə diqqət çəkib. 

 

Belçikalı oyunçu Samir Abasovun baş məşqçi təyin olunmasından sonra Bakı klubunda yaxşıya doğru dəyişikliklər getdiyini deyib: "Çox yaxşı mövsüm keçiririk. Düzdür, bir qədər yaxşı başlamamışdıq. Amma daha sonra klubda məşqçi dəyişikliyi oldu. Bundan sonra isə hər şey yüksəlişə doğru getdi. Düşünürəm ki, yaxşı mənada nələrsə edə bilərik. 

 

Əvvəllər biz daha çox oyunumuzu müdafiədə üzərində qururduq. Samir müəllim isə hücumu düşünür. Bu, mənim üçün daha rahatdır. Həmçinin mən əvvəllər 10 nömrə kimi tək çıxış edirdim. Çox qaçmalı olurdum. İndi isə Emin Mahmudov və Mamadu Kane ilə birlikdə 8 nömrə kimi oynayıram. Bu mənə daha rahatdır". 

 

Buqrin aparıcının "Azərbaycan dilində hansı sözləri bilirsən?" sualını "Demək olar ki, heç nə bilmirəm. Yalnız Ərəb dilində sözlər bilirəm. Hə, bir də bəzi pis sözlər bilirəm. Bunlar da yaxşı deyil (gülür)"" - deyə cavablandırıb. 

 

Futbolçu ən yaxın komanda yoldaşlarından danışarkən isə Stiven Monrouz və Voyislav Stankoviçin adını xüsusən vurğulayıb. Belçikalı oyunçu "Lüksemburq və Azərbaycan futbolunun oxşar və fərqli cəhətləri nədir?" sualını belə cavablandırıb: "Bu ölkələrin futbolu arasında çox fərq var. Hətta əsas liqalarındakı fərqlər də yetərincədir. Azərbaycan Lüksemburqa nisbətən daha yaxşıdır". 

 

Oyunçunun "Piramida"ya verdiyi digər maraqlı açıqlamaları aşağıdakı videodan izləyə bilərsiniz.