“Sumqayıt” layiqli qələbə qazandı”

"Oyunun ağır keçəcəyini bilirdik. Ceyms Adeniyi, Merab Giqauri və Niklas itkiləri bizə çətinlik törətdi. Onların boşluğunu doldura bilmədik. Ayxan Abbasovu təbrik edirəm. Layiqli qələbə qazandılar".

Futbolxeber.az saytının məlumatına görə, bu sözləri "Qəbələ"nin baş məşqçisi Elmar Baxşıyev Azərbaycan Premyer Liqasının 23-cü turunda "Sumqayıt"a 0:2 hesabı ilə uduzduqları matçdan sonra keçirilən mətbuat konfransında deyib.

O, bu məğlubiyyətin komandanı ruhdan salmayacağını bildirib: "Bu gün ümumi oyun planında çatışmazlıqlar var idi. Planlaşdırdığın futbolçular üzərində oyun qurursan, onlar olmadıqda vəziyət 180 dərəcə dəyişir".

Baxşıyev Asif Məmmədovun erkən əvəzlənməsinin oyuna təsirsiz ötüşmədiyini də söyləyib: "Asif komandanı həm müdafiə, həm də hücum planında toparlaya biləcək futbolçudur. Təcrübəsi komandanı özü ilə aparır. Amma itki təkcə o deyildi. Zədəli və cəzalı futbolçularımızın qayıdışından sonra komandanı toparlayacağımıza ümid edirəm".