Klubların Premyer Liqada iştirak üçün müraciət vaxtı başa çatıb

"Aprelin 10-u Premyer Liqada iştirakla bağlı lisenziya əldə etmək istəyən I Divizion klubları üçün son tarix idi. Sadəcə, hazırda lisenziyalaşdırma prosesinin elə fazasıdır ki, prosedurla və sənədlərlə bağlı məlumat verə bilmirik".

Futbolxeber.az saytının məlumatına görə, bu fikirləri "Report"a açıqlamasında AFFA Lisenziyalaşdırma qrupunun rəhbəri Sərxan Hacıyev bildirib.

Onun sözlərinə görə, klubların sənədləri yoxlanılmağa başlayıb: "Yoxlanış bitdikdən sonra Lisenziyalaşdırma Komissiyasına təqdim olunacaq. Bu məsələ ilə bağlı son qərarı da Komissiya verəcək. Buna görə məlumat verə bilmirik".

Hacıyev klubların son günlərdə sənəd təqdim etmədiyini diqqətə çatdırıb: "Son 3 gündə hansısa sənəd verilməyib. Təqdim olunan sənədlərin hansı yerdə olmasına baxılacaq. Biz məxfiliyə görə əvvəlki illərdə də açıqlama verməmişik. Bu fazada hansısa fikir bildirmək məqsədəuyğun sayılmır. Klubların sənədlərinin yerində olub-olmaması ilə bağlı danışa bilmərəm. Əlbəttə, bəzi çatışmazlıqlar var. Lisenziyalaşdırma Komissiyasının iclasından sonra ümumi xarakterli yekun açıqlama verilə bilər".

Lisenziyalaşdırma qrupunun rəhbəri Lisenziyalaşdırma Komissiyasının iclasının mayın ortalarına təyin edildiyini bildirib: "Sadəcə, ötən il toplantı müəyyən səbəblərdən iyunda gerçəkləşib. Komissiyanın iclası əsasən mayda olur".

Qeyd edək ki, I Divizion klublarından "Qaradağ Lökbatan", "Kəpəz", "Turan Tovuz" və "Zaqatala" Premyer Liqada iştirak üçün müraciət edib. MOİK isə əsas liqada oynamaq istəməyib.