AFFA "Xəzər Lənkəran"ın hücumçusunu 3 oyunluq cəzalandırdı

Bu gün AFFA İntizam Komitəsinin növbəti iclası keçirilib. Futbolxeber.az-ın məlumatına görə, Premyer Liqanda çıxış edən klubların əvəzedici heyətlərinin I turunun “Neftçi” - AZAL matçında “Neftçi” klubunun 4 futbolçusu sarı vərəqə ilə cəzalandığı üçün klub 500 manat cərimə olunub. Oyunqabağı nəzərdə tutulan iclasda polis və təcili-tibbi yardım briqadaları iştirak etmədiyi üçün meydan sahibi klub 1000 manat cərimə olunub.

03 avqust 2013-cü il, 2013/2014 mövsümündə, Premyer Liqada çıxış edən klubların əvəzedici heyətlərinin I turunun “Sumqayıt” - “Xəzər Lənkəran” matçının 36-cı dəqiqəsində “Xəzər Lənkəran” klubunun 55 №-li futbolçusu Ağabala Ramazanov komanda yoldaşını təhqir etdiyinə görə birbaşa qırmızı vərəqə alaraq meydandan kənarlaşdırıldığı üçün futbolçu 3 oyunluq cəzalanıb, klub 1000 manat cərimə olunub.

Oyunqabağı nəzərdə tutulan iclasda “Xəzər Lənkəran” klubunun nümayəndəsi iştirak etmədiyi üçün klub 1000 manat cərimə olunub.

03 avqust 2013-cü il, 2013/2014 mövsümündə, Premyer Liqada çıxış edən klubların əvəzedici heyətlərinin I turunun “İnter” - “Qarabağ” matçının 32-ci dəqiqəsində “İnter” klubunun 32 №-li futbolçusu İlqar Ələkbərov idmançıya yaraşmayan hərəkətə görə ikinci sarı vərəqə alaraq meydandan kənarlaşdırıldığı üçün futbolçu 1 oyunluq cəzalanıb, klub 100 manat cərimə olunub.