28 Mart 2024, Cümə axşamı
Ağabala Ramazanov qayıtdı - FOTO
"Zirə"dən ardıcıl 15-ci qələbə
“Səbail”in hücumçusu: 1 qol, 2 qələbə
U-21 millimiz Ukraynaya da uduzdu

Ölkə futbolu

Prosineçki: “Yalan danışmayacam”

Bu gün 2018-ci il dünya çempionatının seçmə qrup mərhələsi çərçivəsində millimiz evdə Almaniyaya 1:4 hesabı ilə uduzub. Futbolxeber.az saytının məlumatına görə, yığmamızın baş məşqçisi Robert Prosineçki matçdan sonra keçirilən mətbuat konfransında jurnalistlərin suallarını cavablandırıb:
 
- Stadionda möhtəşəm ab-hava vardı. Azarkeşlərə təşəkkür edirəm. Çoxdandı, belə atmosfer görməmişdik. Komandamın oyunundan razı qaldım. Güclü rəqiblə qarşılaşmağımıza baxmayaraq, müdafiədə oturmadıq. Yəqin siz də razılaşarsız, 90 dəqiqədən sonra bu komanda ilə fəxr etmək olar. Rəqibi də qələbə münasibətilə təbrik edirəm.
 
- İki fərqli hissə izlədik. İlk hissəylə müqayisədə, ikinci yarıda milli komanda daha yaxşı təsir bağışladı. Buna səbəb almanların bizə şərait yaratması idi, yoxsa sizin fasilədəki tapşırıqlarınız? Bir də, Renat Dadaşovun heyətdə yer almamasına səbəb nə idi?
- Gəlin, fərqli hissələri bir kənara qoyaq. Əfranın səhvindən sonra vurulan qol, həmçinin Qomesin hava mübarizəsində fərqi artırması olmasaydı, fasiləyə 1:1 hesablı bərabərliklə yollansaydıq, kim bilir, nəticə necə olardı. Bir də deyirəm, millimiz bu oyunda hücum etdi, qol fürsətləri yaratdı. Mən yığmanın oyunundan razı qaldım.
 
Renat istedadlı oyunçudu. Ancaq onun cəmi 18 yaşı var. “Ayntraxt”ın gənclər komandasında oynayır. Məncə, bu yaşda belə rəqibə qarşı oyunda ona şans vermək tezdi. Gələcək oyunlarda onun hazır olduğunu gördükdə, şans verəcəm.
 
- Sizcə, oyunun taleyini nə həll etdi? Oyunçuların sizin taktiki tapşırıqlarınızı yerinə yetirməməsi, yoxsa rəqibin ustalıq səviyyəsi?
- Yalan danışmayacam. Bu gün oyunun nəticəsini rəqibin ustalıq səviyyəsi həll etdi. Oyunçularım əllərindən gələni etdilər. Almaniya millisinin üzvləri həftədə azı bir dəfə belə yüksək səviyyəli oyun keçirilər. Bir baxın, bu millinin üzvləri hansı komandalarda oynayırlar.
 
- Milliyə yeni gələndə oyun təcrübəsi olmayan futbolçuların dəvət almayacağını demişdiz. Ancaq bu gün heyətdə oyun təcrübəsi olmayan yetərincə futbolçu var idi. Buna səbəb nədi? Oyunçu çatışmazlığı?
- Rahid Əmirquluyev bu gün yaxşı, əzmkar oyun sərgilədi. Əfran İsmayılova gəldikdə isə, fərq yaradan oyunçudu. 90 dəqiqə onu görməsəniz də, bir ötürmə ilə qol epizodu yarada bilir. Məsələn, Nazarova qol ötürməsinə baxın. Məncə, İsmayılov fərqli oyunçudu. Ola bilsin, siz belə düşünmürsüz. Ancaq məncə, o, yığmaya layiq futbolçudu. Bəli, razıyam, bu gün onun səhvləri də oldu. Ancaq o meydanda olanda komanda daha hücumameyilli, daha inamlı oynayır.
 
- Bu gün millinin maksimum oyununu nümayiş etdirdiyini dediniz. Sizcə, bu oyun Çexiya və Şimali İrlandiyaya qarşı ev oyunlarında məğlub edə bilər?
- Həmin oyunlarda hansı nəticə qeydə alınacaq bilmirəm. Lakin deyə bilərəm ki, millimiz bu cür oyunla hər bir rəqibi məğlub edə bilər.
 
- Oyunun gedişində Maksim Medvedevi yanınıza çağırsanız da, sonra onu meydana buraxmadınız. Buna səbəb nə idi?
- Bədavi Hüseynov oyun zamanı zədəsini olduğunu dedi. Buna görə, Maksimi meydana buraxmaq istədim. Ancaq sonradan Bədavi hər şeyin qaydasında olduğunu dedi. Bu arada, mən Bədavidən çox şey gözləyirəm. Bu gün Bədavi Hüseynov yaxşı təsir bağışladı.
 
- Sizin üçün Almaniya ilə oyun daha çətin keçdi, yoxsa mətbuat konfransı?
- Mənə sizinlə görüşmək həmişə xoşdu. Sadəcə, bəzi fikir ayrılıqları var. Siz bilirsiz, biz bu gün kimlə oynamışıq. Məncə, Almaniya bu gün dünyanın ən güclü millilərindəndi. Fikrimcə, bu komanda gələnilki dünya çempionatının əsas favoritidi. O ki qaldı nəyin daha çətin olmasına, daha çox millini bu oyuna hazırlamaq daha çətin idi. Bəzən deyirsiniz ki, oyunçular 90 dəqiqəni tam çatdıra bilmirlər. Bununla razılaşa bilmərəm.
 
- Bura gələndən həmişə azərbaycanlı jurnalistlərə qarşı aqressiv münasibət göstərmisiz. Sizcə, yerli jurnalistlərin futbol savadı aşağıdı, yoxsa sizin oyun fəlsəfənizi başa düşmürük?
- Mənim danışığım belədi. Bəlkə, aqressiv görünürəm. Ancaq heç vaxt azərbaycanlı jurnalistlərin futbol savadı olmaması barədə heç nə deməmişəm. Dediyim kimi, müəyyən fikir ayrılığı ola bilər. Heç vaxt tənqidə qarşı olmamışam. Lakin həmişə tənqid olmaz. Bəzən yaxşı şeyləri də qabartmaq lazımdı. Lakin mən həmişə mətbuatda mənfi məqamlarla qarşılaşıram. İmkan varsa, komanda barədə bir-iki müsbət söz də yaza bilərsiz. Çünki, millinin yaxşı oyun sərgiləməsi üçün sizin də inanmağınız əsasdı.
 
- Bu gün Dmitri Nazarov meydanda ən yaxşılardan biri idi. Bunda onun ölkə xaricində oynaması da əsas idi. Bu gün ən yaxşılardan biri də Qara Qarayev idi. Sizcə, bu cür oyunçularımız ölkə xaricinə üz tutsa, bu, millinin daha çox xeyrinə olmaz?
- Nazarov 2-ci Bundesliqada sonuncu pillələrdə gedən komandada top qovur. Ancaq bu gün çox yaxşı oyun sərgilədi. Mən istəyərəm ki, millinin oyunçuları güclü çempionatlarda, güclü komandalarda çıxış etsinlər. Ancaq mən onların əllərindən tutub Avropaya apara bilmərik. Bu barədə həmişə onlarla bu barədə danışıram.
 
- Millimiz Almaniyaya qarşı bundan əvvəlki illərdə bundan kiçik hesabla uduzsa da, azarkeşlər sosial şəbəklərdə indiki kimi yığmadan razı qalmamışdılar. Siz azarkeşlərə qarşıdakı oyunlarda neçə xal söz verirsiz?
- Xal yox, ancaq qarşıdakı ev oyunlarında maksimum nəticə əldə etmək üçün mübarizə aparacağımıza söz verirəm. Ən əsas isə Şimali İrlandiya ilə iyunda baş tutacaq oyundu.
 
- Almaniya millisinə qol vurduğumuza görə AFFA-dan mükafat gözləmirsiz? Əvvəllər belə şey olub...
- Biz uduzmuşuq. Yaxşı oynasaq da, uduzmuşuq. Əvvəllər belə şeylər olmasından xəbərim yoxdu. Düzü, məni maraqlandırmır da. İndi bizim üçün əsas olan Şimali İrlandiya ilə oyundu. Həmin oyundan öncə milli 20 gün bir arada olacaq. Bu vaxt ərzində 2 yoxlama oyunu keçirməyi planlaşdırırıq.
 
- Bu gün Kamran Ağayevin oyunundan razı qaldınız? 
- Kamranın klubunda oynamaması böyük problemdi. Onun oyununa qiymət verməyim üçün oyunun videoyazısına baxmalıyam. Ancaq gördüyüm qədərilə qollarda onun səhvi yox idi. İnanıram ki, özünə yaxşı klub tapacaq.
 



Şərh yazılmayıb
ŞƏRH YAZ
Adınız, Soyadınız *  
E-mail    
Təhlükəsizlik kodu    
Kodu daxil edin *  







Arxiv

Mart 2024
B.eÇ.aÇC.aCŞB
01 02 03
04 05 06 07 08 09 10
11 12 13 14 15 16 17
18 19 20 21 22 23 24
25 26 27 28 29 30 31