Cavid İmamverdiyev: "Azarkeşlərə nə cavab verəcəyimi bilmirəm"

Avropa Liqasının II təsnifat mərhələsinin cavab matçında "Şkendiya"ya 1:0 hesabı ilə uduzan "Neftçi" mübarizəni dayandırıb. Futbolxeber.az saytının məlumatına görə, qarşılaşmadan sonra "ağ-qaralar"ın üzvü Cavid İmamverdiyev məğlubiyyəti şərh edib: “Çox ağır oyun oldu. Biz bura qələbə qazanmaq üçün gəlmişdik. Rəqib yaxşı komanda idi. Sona kimi mübarizə apardıq. Lakin alınmadı. Bu gün son dəqiqədə yaxşı mövqedə olmağıma baxmayaraq, qol vura bilmədim. Çox üzgünəm. Həmin epzodda qarşımda 3 müdafiəçi var idi. Topu yaxşı görə bilmədim. Həm də düşündüm ki, yan xətt hakimi bayrağı qaldırıb. Azarkeşlərə nə cavab verəcəyimi bilmirəm. Onlardan utanıram və üzr istəyirəm. Düşünürəm ki, matça tam hazır idim. Üstəlik, indiyə kimi Avroliqada keçirdiyimiz 4 oyunun heç olmasa birində start heyətdə olmağa layiqli idim. Mənim o yaşım deyil ki, ehtiyatda oturum. Oynamaq istəyirəm. Bundan sonra əsas heyətdə olmasam, komandadan getmək istədiyimi rəhbərliyə çatdıracam” (futbolpress.az).